Шавкат Мирзиёев 21 апрель куни Қашқадарё вилоятига ташрифи мобайнида Косон туманидаги «Косон» фермер хўжалиги даласида бўлиб, ғалла ва ғўза ривожини кўздан кечирди. Бу ҳақда Президент матбуот хизмати хабар қилди.
Қайд этилишича, 82 гектар майдонга эга хўжалик асосан шу экинларга ихтисослашган. Ўтган йили пахтадан 41, ғалладан 70 центнердан ошириб ҳосил олинган. Даромад ҳам шунга яраша яхши бўлган, ўтган йили 357 миллион сўм даромад топилган. Бунинг эвазига хўжаликка техникалар харид қилинган, сув тежовчи технологиялар ўрнатилган.
«Бозор иқтисодиётида ишни ҳаракатлантирувчи куч нима? Манфаат. Фермер хўжаликлари ҳам даромадни кўпайтиришни ўйлаши керак. Даромад бор жойда ривожланиш бўлади. Унумдорликни ошириш учун фойданинг бир қисмини илмга, янги технологияларга сарфлаш керак», — деган Шавкат Мирзиёев.
Фермер хўжалигида пахта ва ғалла далалари атрофига ток, тут ва ошқовоқ экилган. Президент бу тажрибани кенгайтириб, барча кластер ва фермер хўжаликлари даласидаги атрофидаги бўш жойларда мева-сабзавотлар етиштириш зарурлигини таъкидлаган.
Таъкидланишича, Қашқадарёда қишлоқ хўжалигида энг катта муаммолардан бири — сув камлиги. Шу боис ёмғирлатиб ва томчилатиб суғориш технологияларини жорий этиш давлат томонидан қўллаб-қувватланмоқда.
«Косон» фермер хўжалигида ҳам ёмғирлатиб суғориш ташкил этилган 23 гектар ғалла баравж ўсмоқда. Бу йил яна 23 гектар ғалла майдонида ёмғирлатиб ҳамда 30 гектар пахта майдонида томчилатиб суғориш технологияси жорий қилинади. Натижада 46 минг метр куб сув, 11 тонна минерал ўғит иқтисод қилинади.
Шу ерда сув хўжалиги объектларидан фойдаланиш тизимини такомиллаштиришга оид лойиҳалар муҳокама қилинган. Давлат раҳбари кластерларга қарашли ерларга сув етказиб бериш бўйича улар билан давлат-хусусий шерикликни йўлга қўйиш мақсадга мувофиқлигини таъкидлаган.
Изоҳ (0)