Ўзбекистонда 2021/2022-ўқув йили якунида 5-6-7-8 ҳамда 10-синфларнинг босқичли имтиҳонлари ўтказилмайди. Бу ҳақда АОКАда ўтказилган брифингда Халқ таълими вазирлиги ахборот хизмати раҳбари Лайло Рустамова маълум қилди.
Хабар берилишича, умумтаълим муассасаларида ўқув машғулотлари 2022 йил 25 май куни тугайди ва 9- ва 11-синф ўқувчиларининг якуний назорат имтиҳонлари 26 майдан 15 июнга қадар ўтказилади.
Байрам муносабати билан қўшимча дам олиш кунларини инобатга олган ҳолда умумий ўрта таълим муассасаларининг 9-синф ўқувчилари учун Жисмоний тарбия фанидан якуний назорат имтиҳонлари 2—7 майдан 11—14 май кунларига кўчирилади.
Жорий ўқув йили якунида 5-6-7-8 ҳамда 10-синфларнинг босқичли имтиҳонлари ўтказилмайди. Ихтисослаштирилган давлат умумтаълим муассасалари ва мактаб-интернатларида эса босқичли имтиҳонлар уларнинг ички низомларига мувофиқ ихтисослашув фанлари доирасида амалга оширилади.
Давлат тест маркази томонидан бериладиган умумтаълим фанини билиш даражаси тўғрисида давлат сертификатга эга ҳамда чет тили фани бўйича B1 ва ундан юқори B2, C1, C2 даражадаги миллий ёки унга тенглаштирилган мос даражадаги халқаро тан олинган сертификатга эга бўлган ўқувчилар тегишли фандан ҳамда чет тили фанидан мактаб педагогика кенгашининг қарори асосида якуний назорат имтиҳонларидан озод этилади.
Якуний назорат имтиҳонларига ўқувчиларни киритиш юзасидан мактаб педагогика кенгаши ўтказиладиган кундан камида 10 кун олдин тегишли синф раҳбари томонидан ишчи гуруҳга умумтаълим фанини билиш даражаси тўғрисида давлат намунасидаги, чет тили фани бўйича B1 ёки ундан юқори даражадаги миллий ёки унга тенглаштирилган мос даражадаги халқаро тан олинган сертификатга эга ўқувчилар рўйхатини ва сертификатлар нусхаларини тақдим этишлари лозим.
Изоҳ (0)