Қашқадарё вилоятининг Деҳқонобод туманида аёлларнинг ичимлик суви талашгани акс этган видео тарқалди. Деҳқонобод тумани ҳокимлиги мазкур воқеага муносабат билдириб, муаммо булоқ сувининг қуриб қолаётгани билан боғлиқлигини маълум қилди.
«Мазкур ҳолат 2022 йилнинг 19 апрель куни туман ҳокими ўринбосари Шердил Эргашев ҳамда ‘Қашқадарё сув таъминоти’ МЧЖнинг туман бўлими бошлиғи Суюн Алланазаровлар иштирокида ўрганилган. Маҳалла ҳудудидаги булоқ қиш ва баҳор фаслининг ўз вақтида ёғингарчиликларсиз келгани ҳисобига қуриб қолмоқда. Тўғрироғи, сув чиқиши анча камайган. Бироқ мазкур муаммо масъуллар, шахсан туман ҳокими назоратига олинган бўлиб, аҳолининг сувсизлик масаласидаги ҳар бир мурожаати ўз вақтида ўрганилган. Ҳатто ўтган мавсумда сув ташувчи махсус автомобиллар орқали аҳолига тоза ичимлик суви етказиб берилган», — дейилади ҳокимлик муносабатида.
Туман ҳокимлиги ахборот хизматининг «Дарё»га қўшимча қилишича, «Нурли келажак» МФЙ ҳудудида учта қишлоқ жойлашган. Мазкур Душа, Галабулоқ ва Обиравон қишлоқларида ҳақиқатан ҳам ичимлик суви билан боғлиқ муаммо бор.
«Видеодаги ҳолат Душа қишлоғида содир бўлган. Аҳоли вакиллари аввалроқ туман ҳокимлигига ҳам мурожаат қилган. Мурожаатга кўра, воқеа жойига туман ҳокими ўринбосари Шердил Эргашев ҳамда ‘Қашқадарё сув таъминоти’ МЧЖнинг туман бўлими бошлиғи Суюн Алланазаровлар бориб, аҳоли билан кўришган ва ичимлик суви билан боғлиқ муаммо 2022 йил якунига қадар ҳал этилишини, унга қадар аҳоли туман сув таъминотининг сув ташувчи махсус автомобиллар орқали арзон ичимлик суви билан таъминланишини маълум қилган», — дейди ҳокимлик ахборот хизмати вакили.
Ҳокимлик вакилининг қўшимча қилишича, мазкур қишлоқдаги ичимлик суви муаммоси 2021 йилнинг ёзида ҳам юзага келган.
«Ўшанда ҳам аҳолига арзон ичимлик суви етказиб берилганди. Бунинг учун аҳоли вакиллари МФЙга ёки ‘Қашқадарё сув таъминоти’ МЧЖнинг туман бўлимига мурожаат қилишлари лозим бўлади», — дейди масъул.
Ҳокимликдагиларнинг таъкидлашича, ҳудудга 2022 йил якунига қадар Оқсув суви тортиб борилади. Шунингдек, Доққи—Бойқўрғон сув қувури таъмирланади.
Аввалроқ Деҳқонобод туманида лойиҳа қиймати 268 миллиард 400 миллион сўм бўлган «Оқсув—Деҳқонобод» лойиҳасининг биринчи босқичи ишга тушгани, 2022 йил якунига қадар лойиҳанинг иккинчи босқичи ҳам ишга туширилиб, туман аҳолисининг 78 фоизи ёки 116 та қишлоқдаги 112,8 мингдан ортиқ аҳоли тоза ичимлик суви билан таъминланаётгани хабар берилганди.
Изоҳ (0)