Навоий вилояти Кармана туманида фуқародан 1,5 миллион сўм пул талаб қилган олий тоифали суд тиббий эксперти қўлга олинди, деб хабар беради вилоят ИИБ ахборот хизмати.
Маълум бўлишича, Кармана туманида яшовчи Х.Ж. рафиқаси билан ўзаро келишмовчиликлари туфайли қайнонаси унинг уйида жанжал чиқарган. Муроса қилишни хоҳламаган қайнона эҳтиётсизлиги оқибатида йиқилиб, тан жароҳати олган. Атрофдаги қўшнилар воқеага гувоҳ бўлса-да, қайнона тан жароҳатида куёвини айблаган. Профилактика инспектори воқеани ўрганиб, Х.Ж.нинг қайнонасининг олган тан жароҳати даражасини аниқлаш мақсадида Кармана тумани Суд тиббий экспертиза бўлимига олиб борган.
Олий тоифали суд тиббий эксперти Б.Н. 1,5 миллион сўм пул эвазига қайнонанинг жароҳатини енгиллаштириб кўрсатишини, акс ҳолда мазкур ҳолат жиноят иши очишга асос бўлиши билан Х.Ж.ни қўрқитган.
Фуқаро ҳолат юзасидан вилоят ИИБ бошлиғига билдирги билан мурожаат қилган. Х.Ж. телефон орқали шифокор билан суҳбатлашиб, пулни эса айтилганидек унинг қўл остидаги ишчиси — 29 ёшли Ф.Д.га беришини айтган.
Эксперт-шифокорнинг ходими пулларни олаётган вақтида ИИВ ШХББ Навоий вилояти бўйича бўлими ходимлари ҳамда ҳуқуқни муҳофаза қилувчи бошқа органлар билан ҳамкорликда ўтказилган тезкор тадбир иштирокчилари томонидан қўлга олинган.
Ф.Д.нинг розилиги асосида тезкор тадбир давом эттирилиб, шу куннинг ўзида пуллар мутахассис шифокорга етказилганида у ҳам ушланган.
Аввалроқ Сирдарёда тез ёрдамга диспетчерликка ишга киритиб қўйиш учун 700 доллар сўраган шифокор қўлга олингани, Қашқадарёда бош шифокор 500 минг сўм, агроинспекция инспектори эса 3 миллион сўм пора билан қўлга тушгани, Қашқадарёда поликлиника бош шифокори 2 минг доллар пора билан ушлангани тўғрисида хабар берилганди.
Изоҳ (0)