2022 йил 14 апрель куни Капурлар оиласи хонадонида тўй садолари янгради – афсонавий Раж Капурнинг набираси ва Риши Капурнинг ўғли – Ранбир ниҳоят актриса Алия Бҳатт билан турмуш қурди. Bollywoodtime нашри ҳинд киносининг энг кўркам актёрларидан бирининг ҳаёти ҳамда ижодий фаолияти ҳақида қизиқарли маълумотларни тақдим этди.
Ранбир Капур 1982 йил 28 сентябрда Мумбайда актёрлар Риши Капур ва Ниту Сингх оиласида туғилган. Бугунги кунда у ҳинд киносида энг кўп гонорар олувчи актёрлардан бири ҳисобланади. Аммо Ранбирнинг айтишича, у ҳеч қачон актёр бўлишни хоҳламаган.
Нима бўлганда ҳам, Капурлар ва актёрлик ажралмас тушунчалардир. Ўсмирлик даврида Ранбир амакиси Ражив Капурнинг «Муҳаббат китоби» (1996) драмасида режиссёр ёрдамчиси сифатида ишлай бошлади ва кейинчалик Санжай Лила Бҳансалидан тажриба орттириб, унга «Зулмат» фильмини суратга олишда ёрдам берди. Ушбу фильм Бҳансали ва Ранбир Капурнинг Болливудга йўлбошчиси бўлди ва у «Маъшуқам» (2007) дебют фильмида суратга тушди.
Афсуски, мазкур романтик мелодрама тижорий муваффақиятга эришмади, лекин Ранбир йилнинг «Энг яхши янги актёри» Filmfare мукофоти ва Stardust’нинг «Эртанги куннинг супер юлдузи» унвонини қўлга киритди. Вақт ўтиши билан Капур ҳақиқатан ҳам «Уйғон, Сид!», «Ғалати севгининг ажойиб ҳикояси», «Сиёсатчилар», «Рок юлдузи», «Юрак масалалари», «Санжу» каби фильмларда ўйнаган энг истиқболли актёрлардан бирига айланди.
Шахсий масалада буюк сулоланинг вориси доимо беқарор эди. У кўнгил қўйган аёллар тез-тез ўзгарарди. Актёр интервьюларнинг бирида бу масалада очиқ гапирди ва ота-онасининг никоҳи унга муносабатлар қанчалик қийин бўлишини ўргатганини айтиб ўтди. Балки шунинг учун ҳам у қарийб 40 ёшгача Ҳиндистондаги энг машҳур бўйдоқлардан бири ҳисобланган.
Отаси Риши Капур ҳам ўғлининг ўсмирлик даврида у билан муносабатлари оғир бўлганини яширмаган. Ранбир ҳар доим онаси Ниту Сингх билан яқин бўлган ва отаси билан муносабатлари эса унчалик ҳам яхши эмасди. У 15 ёшида гиёҳванд моддаларни қабул қила бошлаганини яширмайди. Қолаверса, ўқишни ёқтирмас, шунинг учун ҳам Ранбир тез-тез мактаб билан боғлиқ муаммоларга дуч келди. Фақат улғайгандан кейингина отаси билан тил топишди ва муносабатларини яхшилади.
Ранбирнинг сўзларига кўра, биринчи жиддий муносабатлар еттинчи синфда бошланган ва у тугагач, бўлажак актёр депрессиядан азият чеккан. 2008 йилда «Огоҳ бўлинг, гўзаллар!» фильмини суратга олиш жараёнида Капур ўзининг ҳамкасби Дипика Падуконе билан учрашишни бошлади. Бироқ бир йил ўтгач, у Катрина Каиф билан «Ғалати севгининг ажойиб ҳикояси» фильмини суратга олиш пайтида Дипикага хиёнат қилди. Кейинроқ Капур шундай деди: «Ҳа, Дипика билан мен ноетуклик, тажрибасизлик, юракцизлик ва васвасага берилиб кетганим учун ажрашдик».
Бироқ Дипика ва Ранбир дўстона муносабатларни сақлаб қолишга муваффақ бўлди ва ҳатто бир нечта лойиҳаларда биргаликда ишлади. Аммо Ранбир Катрина билан 7 йил мобайнида учрашди, лекин актёр яна бошқа актрисалар билан ишқий муносабатларни бошлади, улардан бири Ранбирни болалигидан бошлаб севиб қолган Алия Бҳатт эди.
Айтиш жоизки, Алия Ранбирдан 11 ёш кичик. Ҳозирда жуфтлик 2022 йилнинг кузида тақдимотга тайёрланаётган «Браҳмастра» лойиҳаси устида ишламоқда.
Ранбир актёрликдан ташқари мусиқани ҳам яхши кўради. У болалигидан табла ва ноғора чалишни ўрганган ва «Рок юлдузи» (2011) фильмига суратга тушишдан олдин Жордан ролига тайёргарлик кўриш учун гитара сабоқларини олган. У бу чолғу асбобига шунчалик меҳр қўйганки, уни ҳамма жойда ўзи билан олиб юрган ва ҳар бир бўш дақиқада чалган.
Ранбир футболни яхши кўради ва кўпинча ўзи ҳам ўйнайди. Капур ҳозирги авлоднинг энг келишган ҳинд актёрларидан бири ҳисобланади. 2010 йилдан 2015 йилгача у ҳар йили The Times of India томонидан «Ҳиндистондаги энг келишган эркаклари» 10 талигидан жой олди. Шунингдек, Ранбир — Pepsi, Панасониc, Renault Индиа, Lenovo ва бошқа дунёга машҳур брендларнинг юзи. У олтита Filmfare мукофоти совриндори ва уни олдинда иккита жуда катта лойиҳа кутмоқда: «Шамшера» ва «Браҳмастра».
«Мен нафақага чиққанимда, катта эҳтимол билан футбол мураббийи бўламан», — дейди Ранбир.
Изоҳ (0)