Қашқадарё вилоятининг Қарши шаҳрида суғурта полислари тўловлари билан боғлиқ талон-торожлик аниқланди, деб хабар беради Бош прокуратура ҳузуридаги департамент.
Маълум қилинишича, департаментнинг Қашқадарё вилоят бошқармаси томонидан тадбиркорлик субъектларининг ҳуқуқларини ҳимоя қилиш юзасидан «К.С» АЖнинг мурожаатига асосан терговга қадар текширув ўтказилган. Текширув давомида жамиятнинг Қарши шаҳар филиали собиқ менежери З.Х. мижозлар билан тузилган 129 дона суғурта полислари бўйича 119,7 миллион сўмлик тўловларни қабул қилиб, филиалга кирим қилмасдан талон-торож қилгани аниқланган.
Мазкур ҳолат юзасидан Жиноят кодексининг 167-моддаси (ўзлаштириш ёки растрата йўли билан талон-торож қилиш) билан жиноят иши қўзғатилиб, тергов ҳаракатлари ўтказилмоқда.
Аввалроқ Наманганда қайнота ўғлининг қарзини тўлаш учун келини номига 2 млрд сўм кредит олгани, Тошкент вилоятида 2,6 млрд сўм кредит маблағларини талон-торож қилган банк ходими ушлангани, Наманганда фуқароларга ажратилган 223,5 млн сўм имтиёзли кредитни қўлга киритган шахс аниқлангани тўғрисида хабар берилганди.
Мавзуга доир:
- Фарғонада сув идораси раҳбари ва бошқа мансабдор шахслар 720 млн сўмдан ортиқ маблағни талон-торож қилгани аниқланди
- Ўзбекистонда 23 та уй-жой мулкдорлари ширкати томонидан 1,7 млрд сўм талон-торож қилингани аниқланди
- Олмалиқда қарийб 220 млн сўмлик насос агрегаторларини ўзлаштирган корхона раҳбари ушланди
Изоҳ (0)