Ижтимоий тармоқларда бир фуқаро ички ишлар органлари ходимларининг қонуний талабларини бажармасдан, жамоат тартибини бузиб шовқин кўтараётганлиги акс этган видео тарқалди. Ушбу видеога шарҳда эса гўёки Тошкент шаҳар ҳокими қабулига келган фуқарони қабулга қўйишмаётгани ҳақида маълумот берилган. Тошкент шаҳар ИИББ видеодаги ҳолатга муносабат билдирди.
Маълум қилинишича, 10 апрель куни соат 19:00 ларда Чилонзор туманидаги «Дилобод» маҳалласида 26 ёшли Т.Г. бир нечта фуқаро билан оғзаки жанжаллашиб, жамоат тартибини бузган. Сўнг воқеа жойига етиб келган ички ишлар органлари ходимларининг жамоат тартибини сақлаш ҳақидаги қонуний талабини бажармасдан, оммани ўзига қаратиш мақсадида бақир-чақир қилиб, ИИО ходимларидан қочишга ҳаракат қилган.
Ушбу фуқарога нисбатан Маъмурий жавобгарлик тўғрисидаги кодексининг 183-моддаси (майда безорилик) ҳамда 194-моддаси (ички ишлар органлари ходимининг қонуний талабларини бажармаслик) аломатлари билан маъмурий баённома расмийлаштирилиб, ўрнатилган тартибда кўриб чиқишлик учун судга тақдим этилган.
«Ҳурматли фуқаролар, содир бўлаётган воқеани, унинг сабабларини тўлиқ билмасдан туриб видеоларга ўзбошимчалик билан шарҳ бермаслигингизни сўраймиз. Унутманг, ёлғон ахборот тарқатганлик учун жавобгарлик мавжуд», — дейилади муносабатда.
Аввалроқ Фарғонада ИИБ ходимларини ҳақорат қилиб, тан жароҳати етказган маст ҳайдовчига жиноят иши қўзғатилгани, Самарқандда ИИБ ходимларининг қонуний фаолиятига қаршилик кўрсатган 16 нафар спортчи қамоққа олингани тўғрисида хабар берилганди.
Изоҳ (0)