Ижтимоий тармоқларда икки эркак вояга етмаган бола кўз ўнгида эшакларнинг бўйнига таёқ билан зарба берган видеоси тарқалганди. Ҳайвонларга озор берган ота-ўғил жавобгарликка тортилди. Бу ҳақда «Дарё»га вилоят суди ахборот хизмати раҳбари Фарҳод Тилавов хабар берди.
Маълум қилинишича, воқеа 2021 йил вилоятнинг Чироқчи туманидаги «Лангар» МФЙ Тўлақўрғон қишлоғида содир бўлган бўлиб, воқеа иштирокчилари ота-ўғиллар бўлган.«Судья Ўктам Расулов раислигидаги кўриб чиқилган ишда ҳайвонларга озор берган ота Алишер Илёсов Маъмурий жавобгарлик тўғрисидаги кодекснинг 111-моддаси 2-қисми (вояга етмаган шахс ҳозирлигида ҳайвонларга нисбатан шафқатсиз муносабатда бўлиш ёхуд ҳайвонларнинг майиб бўлишига олиб келиш) билан айбдор деб топилиб, унга 12 сутка маъмурий қамоқ жазоси тайинланди. Воқеанинг иккинчи иштирокчиси судланувчининг ўғли Б.С. вояга етмагани учун унинг хатти-ҳаракати учун ҳам отаси Алишер Илёсов Маъмурий жавобгарлик тўғрисидаги кодекснинг 47-моддаси (болаларни тарбиялаш ва уларга таълим бериш борасидаги мажбуриятларни бажармаслик) билан айбли деб топилиб, базавий ҳисоблаш миқдорининг бир баравари (270 минг сўм) миқдорида жаримага тортилди», — дейди Фарҳод Тилавов.
Бундан аввал Тошкентда қўшнисининг иккита хаски зотли итини ўлдирган эркакка 1,35 млн сўм жарима белгилангани, Навоийда номаълум эркак болалар кўз ўнгида итни отиб ташлагани ҳамда Тошкентда ит ва мушукларни милтиқда отиб юрган эркак ушлангани ҳақида хабар берилганди.
Изоҳ (0)