2022 йилнинг март ойида Марказий банк томонидан ўтказилган сўров натижаларига кўра, аҳоли томонидан сезилган инфляция февраль ойидаги кўрсаткичга нисбатан 2,6 фоиз бандга юқорилаб, 15,7 фоизни ташкил этди.
Март ойида инфляциянинг таъсири 2 ва 2—4 млн сўм даромадга эга бўлган уй хўжаликларига кўпроқ таъсир кўрсатди. 2 млн сўмгача даромад қилувчи оилаларнинг озиқ-овқат инфляцияси 15,7 фоизни ташкил қилган бўлса, 2 миллиондан 4 млн сўмгача даромад қилувчи оилаларда бу 12 фоизгача кўтарилди.
Юқори даромадли оилалар учун озиқ овқат инфляцияси 8,6 фоизга тенг бўлди. Улар кам даромадли гуруҳга нисбатан инфляция таъсирини камроқ сезишди.
Сўровномада умумий жавоб берувчиларнинг аксарият қисми инфляцияни 9-12 фоиз атрофида сезишган. Нархлар ошишининг юқори бўлганини таъкидлаган аҳоли орасида ҳам ўсиш кузатилган.
Кўпчилик март ойида шакар ва қандолат маҳсулотлари, ёғ ҳамда гўшт ва сут маҳсулотлари қимматлаганини сезган бўлса, дуккакли маҳсулотлар, тиббий хизматлар ҳамда ичимликлар нархлари ўсиши камроқ сезилган.
Тиббиёт, савдо, қурилиш ҳамда давлат ташкилотида фаолият юритаётган аҳоли томонидан сезилган инфляция даражаси бошқа соҳа вакилларига нисбатан юқорироқ бўлган.
Сирдарё, Самарқанд ҳамда Фарғона вилоятларида инфляция қолган ҳудудларга қараганда юқорироқ сезилган бўлса, нисбатан паст кўрсаткичлар Сурхондарё вилояти ва Қорақалпоғистон Республикасида қайд этилган.
Март ойида йиллик инфляция 10,5 фоизни ташкил қилган бўлса, озиқ-овқат маҳсулотлари инфляцияси эса 14,5 фоизга етди. Нархларнинг ўзгариши юқори даромадли гуруҳларга нисбатан кам даромадли гуруҳларда кўпроқ сезилган.
Аввалроқ Ўзбекистонда март ойидаги инфляция сўнгги 9 ой ичида энг юқориси бўлгани маълум қилинганди.
Изоҳ (0)