Янги Ўзбекистон мажмуасида «Бағрикенглик боғи» очилди

Тошкент вилояти Қибрай туманида жойлашган «Янги Ўзбекистон» боғида 5 март куни дарахт экиш тадбири ўтказилди. Республикадаги диний конфессиялар ва миллий-маданий марказлар раҳбарлари иштирок этган тадбирда 30 та дарахт кўчати ўтқазилди, — дея хабар бермоқда «Дарё» мухбири.

Миллатлараро муносабатлар ва хорижий мамлакатлар билан дўстлик алоқалари қўмитаси раиси ўринбосари Азамат Тошев мазкур жамоа эккан кўчатлар ҳудуди «Бағрикенглик боғи» деб аталади.

«Боғга Туркиядан олиб келинган 30 та лола дарахти экилди. Бундай навдаги кўчат экилишининг сабаби аввало ерга ўтқазилаётган дарахт «Янги Ўзбекистон» боғи ҳудудига мос келиши керак. Ўйлайманки, бу дарахтлар яхши кўкаради. Кўчатларни 14 та миллий-маданий марказ ва 16 та конфессия биттадан олиб келди ва жами 30 та кўчат (бир хил турдаги) экилди», — деди қўмита масъули.

Тадбир доирасида Ўзбекистон мусулмонлари идораси раиси, муфтий Нуриддин Холиқназаров журналистларга берган интервьюсида ислом динида дарахт экиш савобли амаллардан ҳисобланишини айтди.

«Файзли рамазон ойида «Бағрикенглик боғи» барпо қилиняпти. Дин ишлари бўйича қўмита, президент девони, Ўзбекистондаги барча диний конфессиялар иштирокида дарахт экиш тадбирини ўтказдик. Кўчат экиш юртимизда энг хайрли ишлардан бири. Барча дин вакиллари келиб дарахт экяпмизки, иншааллоҳ, келажак авлод бу боғни бағрикенглик нишонаси эканига гувоҳ бўлади. Ислом дини нуқтаи назаридан олиб қараганда ҳам энг савобли ишлардан бири дарахт экмоқликдир.

Пайғамбаримиз (с.а.в.) бизга тавсия бериб: «Агар ким дарахт экаётган бўлса-ю, мабодо қиёмат бошланиб қолган тақдирда ҳам ўша дарахтни охиригача экиб қўйсин», деганлар. Нима учун? Аслида қиёмат бошланса, дарахт керак бўлмас эди. Аммо бунинг савоби ва аҳамияти улуғлигидан пайғамбаримиз шу гапни айтганлар. Келажак авлод олдидаги энг катта бурчларимиздан биттаси соф ва гўзал табиатни уларга мерос қилиб қолдиришдир», — деди Нуриддин Холиқназаров.