Ўғрилик қилгани сабаб олти йил муддатга озодликдан маҳрум қилиниб, суд ажрими билан ўталмай қолган 3,5 йил муддатини Самарқанддаги манзил колонияда ўтаётган шахс Қашқадарёдаги хонадонларга ўғриликка кирди. Бу ҳақда вилоят ИИБ ахборот хизмати хабар тарқатмоқда.
Маълум бўлишича, 2022 йил 15 март куни соат 09:00 да Китоб тумани «Халқлар дўстлиги» маҳалласида яшовчи уй бекаси Б.А. яшаш уйига нотаниш шахс кириб, уйида бўлган 250 минг сўм пули ва бир жуфт эркаклар оёқ кийимини ўғирлаб кетганини баён қилган. Шу маҳаллада яшовчи Т.Б. ҳамда «Чармгар» маҳалласида турувчи П.Ш.лар 16 март куни ИИБга мурожаат қилиб, номаълум шахслар хонадонига кириб, буюмларини титганини, дераза ойналарини синдириб, тартибсиз ҳолатга келтирганини билдирган. Шунингдек, «Ҳамид Олимжон» маҳалласидаги нафақахўр аёл Р.Р. ҳам уйига ўғри тушганидан шикоят қилган.
Мазкур ҳолат юзасидан олиб борилган терговга қадар текширувлар давомида ҳодиса жойидаги ойна синиқлари вилоят ИИБ ЭКБдаги биометрик идентификация тизимида текшириб кўрилганида бармоқ излари Китоб туманининг «Чармгар» кўчасида яшовчи, 2019 йилда ўғрилик қилгани боис олти йил муддатга озодликдан маҳрум қилиниб, суднинг 2022 йил 10 февралдаги ажрими билан ўталмай қолган 3,5 жазо муддатини Самарқанд вилоятининг Пайариқ туманида жойлашган 37-сонли манзил калониясида ўтаётган Р.Ж.га тегишли экани аниқланган.
Р.Ж. жазо ўтаётган вақтда, яъни 2022 йил 15 март куни манзил калонияни рухсатсиз тарк этиб, жиноий режасини амалга ошириш учун Китоб туманига келган ва юқорида тилга олинган хонадонларга ўғриликка кирган.
Мазкур ҳолат юзасидан Китоб туман ИИБ ҳузуридаги Тергов бўлими томонидан жиноят иши қўзғатилди.