ЎФА тартиб-интизом қўмитасида Суперлига 4-тури доирасида кечган «Пахтакор» — «Навбаҳор» учрашувида (1:0) содри бўлган ҳолатлар кўриб чиқилди ва айбдорлар жазога тортилди.
Учрашувнинг сўнгги дақиқаларида «Пахтакор» фан-клуби етакчиси Жавоҳир Зокиров техник зонада пайдо бўлган ва майдондан чиқиб кетган тўпни қасддан тепиб юборган. Унинг ҳаракатлари мухлислар, рақиб жамоа аъзолари ва расмийлари норозилигига сабаб бўлган.
Ўйиндан кейин «Навбаҳор» дарвозабони Ўткир Юсупов Зокиров билан муштлашиб кетган ва унга зарба берган. Бу ҳолат бўйича Зокиров ва Юсуповга жарима интизом чораси қўлланилган.
«Навбаҳор» мураббийи Григорий Колосовский юқоридаги вазият сабаб тинчлана олмаган ва майдонда, трибуна ости йўлакчасида, кийиниш хонаси атрофида рақиб жамоа вакиллари ҳамда ПФЛ расмийлари билан жанжаллашган, уларни шахсиятга тегувчи сўзлар билан бир неча бор ҳақорат қилган. Шунингдек, мураббийни тинчлантиришга уринган расмий шахсларга зарба беришга уринган ва ПФЛ расмийси талабига риоя қилмай, аккредитацияни қайтаришдан бош тортган.
ЎФА тартиб-интизом қўмитаси Колосовскийни 3 та ўйинга дисквалификация қилди ва молиявий жарима интизом чораси қўллади.
Шунингдек, «Пахтакор» матбуот котиби Беҳзод Назаров, клуб катта менежери Илҳом Яквалхўжаев ҳам жаримага тортилган. Улар ўйин якунлангач трибуна ости йўлакчасида ножўя хатти-ҳаракатларни амалга ошириб, «Навбаҳор» жамоаси расмийларини қўпол сўзлар билан ҳақорат қилган.
«Навбаҳор» жамоаси ўйин якунлангач, кийиниш хонасининг ички ва ташқи деворларига зарар етказиб, уни таъмирталаб ҳолга келтиргани боис клуб жаримага тортилган.
Аввалроқ, мазкур ўйиндан кейин икки жамоа мухлислари ўртасида жанжал келиб чиққани, натижада «Навбаҳор» мухлисининг 2 та тиши сингани, тез ёрдамга мурожаат қилгани ва тез ёрдам ходими ҳам беморни «Пахтакор» стадиони ёнидан олганини тасдиқлагани ҳақида хабар қилинганди.
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @Daryo_Sport24’га обуна бўлинг!
Изоҳ (0)