O‘FA tartib-intizom qo‘mitasida Superliga 4-turi doirasida kechgan “Paxtakor” — “Navbahor” uchrashuvida (1:0) sodri bo‘lgan holatlar ko‘rib chiqildi va aybdorlar jazoga tortildi.

Uchrashuvning so‘nggi daqiqalarida “Paxtakor” fan-klubi yetakchisi Javohir Zokirov texnik zonada paydo bo‘lgan va maydondan chiqib ketgan to‘pni qasddan tepib yuborgan. Uning harakatlari muxlislar, raqib jamoa a’zolari va rasmiylari noroziligiga sabab bo‘lgan.

O‘yindan keyin “Navbahor” darvozaboni O‘tkir Yusupov Zokirov bilan mushtlashib ketgan va unga zarba bergan. Bu holat bo‘yicha Zokirov va Yusupovga jarima intizom chorasi qo‘llanilgan.

“Navbahor” murabbiyi Grigoriy Kolosovskiy yuqoridagi vaziyat sabab tinchlana olmagan va maydonda, tribuna osti yo‘lakchasida, kiyinish xonasi atrofida raqib jamoa vakillari hamda PFL rasmiylari bilan janjallashgan, ularni shaxsiyatga teguvchi so‘zlar bilan bir necha bor haqorat qilgan. Shuningdek, murabbiyni tinchlantirishga uringan rasmiy shaxslarga zarba berishga uringan va PFL rasmiysi talabiga rioya qilmay, akkreditatsiyani qaytarishdan bosh tortgan.

O‘FA tartib-intizom qo‘mitasi Kolosovskiyni 3 ta o‘yinga diskvalifikatsiya qildi va moliyaviy jarima intizom chorasi qo‘lladi.

Shuningdek, “Paxtakor” matbuot kotibi Behzod Nazarov, klub katta menejeri Ilhom Yakvalxo‘jayev ham jarimaga tortilgan. Ular o‘yin yakunlangach tribuna osti yo‘lakchasida nojo‘ya xatti-harakatlarni amalga oshirib, “Navbahor” jamoasi rasmiylarini qo‘pol so‘zlar bilan haqorat qilgan.

“Navbahor” jamoasi o‘yin yakunlangach, kiyinish xonasining ichki va tashqi devorlariga zarar yetkazib, uni ta’mirtalab holga keltirgani bois klub jarimaga tortilgan.

Avvalroq, mazkur o‘yindan keyin ikki jamoa muxlislari o‘rtasida janjal kelib chiqqani, natijada “Navbahor” muxlisining 2 ta tishi singani, tez yordamga murojaat qilgani va tez yordam xodimi ham bemorni “Paxtakor” stadioni yonidan olganini tasdiqlagani haqida xabar qilingandi.