Туризм ва маданий мерос вазирлиги «Хорижий давлатларда Ўзбекистон тарихи, маданияти ва ўзбек тилини ўрганиш тизимини кенг тарғиб этиш орқали хорижий туристлар оқимини янада кўпайтириш ҳамда мамлакатимиз нуфузини янада оширишга доир қўшимча чора-тадбирлар тўғрисида»ги президент қарори лойиҳасини муҳокамага қўйди.
Қарор лойиҳасига кўра, Вазирлар Маҳкамасининг хорижий мамлакатларда ўзбек тили ва адабиёти, маданияти ва тарихини замонавий ахборот технологияларидан фойдаланган ҳолда ўрганишни назарда тутувчи Uzacademy интернет платформасини ташкил этиш тўғрисидаги таклифига розилик берилади.
Шунингдек, Ўзбекистоннинг бой илмий, тарихий, маданий ва маънавий меросини ўрганишга қизиқиш юқори бўлган хорижий таълим ва илмий муассасаларда ўзбек тили ва маданияти ўқитиладиган Uzbek Studies кафедралари фаолияти йўлга қўйилади.
2023 йил 1 январдан бошлаб ҳар йили Uzacademy интернет платформаси орқали онлайн тарзда ҳамда Uzbek Studies кафедраларда таълим олаётган ёшлар ўртасида олимпиада, викторина ва мусобақаларда ғолиб бўлганлар учун «Хуш келибсиз, Ўзбекистонга!» дастури амалга оширилади.
Бунда:
- олимпиада, викторина ва мусобақалар ғолибларига Ўзбекистондаги олий таълим муассасаларида давлат гранти асосида ўқиш, ёш олимларга юртимизга оид илмий-тадқиқот ишларини олиб бориш учун стипендиялар таъсис этилади;
- давлат гранти 10 нафар бакалавриат таълим йўналишлари ва 10 нафар магистратура мутахассисликларига, стипендиялар 10 та ўрин учун докторантура ва стажировка ўташга ажратилади.
Бош вазир ўринбосари — туризм ва маданий мерос вазири Азиз Абдуҳакимов бир ой муддатда платформа ва кафедралар фаолиятини ташкил қилиш ва ривожлантириш ишларини мувофиқлаштириш мақсадида идораларо ишчи гуруҳини ташкил этади. Идораларо ишчи гуруҳи:
- Uzacademy интернет платформаси ва Uzbek Studies кафедралари фаолиятини ташкил қилиш ва ривожлантириш бўйича чора-тадбирлар амалга оширилишининг бориши устидан тизимли назоратни амалга оширади;
- давлат органлари, вазирликлар, давлат қўмиталари ва идораларнинг фаолиятини мувофиқлаштириш, платформа ва кафедралар фаолиятини ташкил қилишга тўсқинлик қилаётган масалаларни тезкор кўриб чиқади ва ҳал қилади;
- хорижий мамлакатларда ўзбек тили ва адабиёти, маданияти ва тарихини кенг тарғиб қилишга қаратилган қўшма тадбирларни хорижда ўтказиш бўйича чора-тадбирларни тасдиқлайди ва амалга оширилишини назорат қилади;
- Платформа ва кафедралар фаолиятини ташкил қилиш ва ривожлантириш билан боғлиқ бўлган харажатлар сметасини ҳамда платформа ва кафедралар фаолиятини молиялаштириш манбаларини тақсимлайди ва тасдиқлайди.
Изоҳ (0)