Шавкат Мирзиёев ва Туркия президенти Ражаб Тоййиб Эрдўғон 29 март куни Кўксарой қароргоҳидаги Фахрий меҳмонлар хиёбонига кўчат ўтқазди. Бу ҳақда Президент матбуот хизмати хабар қилди.
Қайд этилишича, бу йил Ўзбекистон билан Туркия ўртасида дипломатик алоқалар йўлга қўйилганига 30 йил, Стратегик шериклик муносабатлари ўрнатилганига 5 йил тўлган. Ушбу ниҳол ҳамкорлик ривожида янги давр бошланаётганининг рамзи бўлган.
Хиёбонда бошқа ҳамкор давлатлар раҳбарлари эккан дарахтлар ҳам бор.
Эслатиб ўтамиз, Шавкат Мирзиёевнинг таклифига биноан Туркия президенти Ражаб Тоййиб Эрдўғон 29—30 март кунлари расмий ташриф билан Ўзбекистонда бўлиши хабар қилинганди. 29 март куни Кўксарой қароргоҳида Эрдўғонни расмий кутиб олиш маросими бўлиб ўтди.
Сўнг икки мамлакат етакчилари иштирокида Ўзбекистон—Туркия стратегик шериклик кенгашининг иккинчи йиғилиши бўлиб ўтди. Шавкат Мирзиёев мулоқот аввалида Туркия етакчиси ва халқини Наврўз байрами билан табриклаб, «етакчи турк компаниялар билан аниқ лойиҳалар сонини кўпайтириш ниятида» эканини айтиб ўтди.
Шунингдек, Шавкат Мирзиёев таълим соҳасида ҳамкорлик давом эттирилиб, мамлакатда янги университетлар иш бошлашини айтиб ўтган. «Ўтган йили Анқара ва Истанбул шаҳарларида Ўзбекистон маданият кунлари муваффақиятли ўтказилди. Жорий йилда Тошкент ва Самарқанд шаҳарларида Туркия маданият кунларини ўтказишни таклиф қиламан», — дейди Ўзбекистон президенти.
Йиғилишда Туркия президенти Шавкат Мирзиёев амалга ошираётган ислоҳотларни юксак баҳолаб, «олти йилдан буён қардошим қатъийлик билан амалга ошираётган ислоҳотларни юксак баҳолаймиз. Бундан кейин ҳам Туркия Ўзбекистоннинг стратегик ҳамроҳи сифатида қолади», — деди.
Мазуга доир:
- «Мудофаа тизимини янада ривожлантиришга келишиб олдик». Эрдўғон Ўзбекистон—Туркия ҳамкорлиги истиқболлари ҳақида
- «Ўзбекистон—Туркия стратегик шериклик кенгашининг учинчи йиғилишини ўтказиш учун Туркияга боришни режалаштирганмиз» — Шавкат Мирзиёев
- Шавкат Мирзиёев ва Ражаб Тоййиб Эрдўғон Тошкент вилоятидаги ИЭСни ишга тушириш маросимида қатнашди (драфтда)
Изоҳ (0)