«Етакчи турк компаниялар билан аниқ лойиҳалар сонини кўпайтириш ниятидамиз» — Шавкат Мирзиёев

Туркия президенти Ражаб Тоййиб Эрдўғон Ўзбекистонда бўлиб турибди. Айни вақтда икки мамлакат етакчилари иштирокида Ўзбекистон—Туркия стратегик шериклик кенгашининг иккинчи йиғилиши бўлиб ўтмоқда, деб хабар бермоқда «Дарё» мухбири.

Қайд этилишича, Шавкат Мирзиёев мулоқот аввалида Туркия етакчиси ва халқини Наврўз байрами билан табриклаган. Ўзбекистон президенти Тошкентда биринчилардан бўлиб Туркия элчихонаси очилганини алоҳида қайд этиб, «буни қадрлашини» айтган.

«Тор доирадаги учрашувимизда барча масалаларда қарашларимиз бир хил эканини кўрсатди, шунингдек, эришилган ютуқларни алоҳида эътироф этдик. Олий даражада келишилган масалаларнинг барчасини амалга оширишни келишиб олдик. Биз келажакда катта лойиҳаларни бирга амалга оширишдан манфаатдормиз. Логистика ва авиақатновларни кенгайтиришимиз лозим. Туркиянинг етакчи компаниялари билан тўқимачилик, туризм, фармацевтика, қурилиш каби соҳаларда бирга янги лойиҳаларни амалга оширишимиз зарур. Бундан ташқари етакчи турк компаниялар билан аниқ лойиҳалар сонини кўпайтириш ниятидамиз. Ўзбекистонда турли соҳаларда лойиҳаларни амалга оширишда туркиялик мутахассислар кўмаклашмоқда», — деди Шавкат Мирзиёев.

Эслатиб ўтамиз, Шавкат Мирзиёевнинг таклифига биноан Туркия президенти Ражаб Тоййиб Эрдўғон 29—30 март кунлари расмий ташриф билан Ўзбекистонда бўлиши хабар қилинганди. 29 март куни Кўксарой қароргоҳида Эрдўғонни расмий кутиб олиш маросими бўлиб ўтди.