Шавкат Мирзиёевнинг таклифига биноан Туркия президенти Ражаб Тоййиб Эрдўғон расмий ташриф билан Ўзбекистонга келди. Бу ҳақда «Дарё» мухбири хабар бермоқда.
Туркия етакчиси рафиқаси Эмине Эрдўған, шунингдек, адлия вазири Бекир Боздағ, миллий мудофаа вазири Ҳулуси Акар, меҳнат ва ижтимоий хавфсизлик вазири Ведат Билгин, соғлиқни сақлаш вазири Фаҳреттин Кожа, савдо вазири Меҳмет Муш, президентлик алоқа директори Фаҳреттин Алтун ва президент мудофаа саноати раҳбари Исмоил Демир ҳам Тошкентга келди.
Туркия президенти Шавкат Мирзиёев ҳамроҳлигида «Янги Ўзбекистон» боғига ташриф буюриб, Мустақиллик монументи пойига гул қўйди.
Кўксарой қароргоҳида олий мартабали меҳмонни расмий кутиб олиш маросими бўлиб ўтди.
Маросимда саф тортган фахрий қоровулни янги либосларда кўриш мумкин.
Ражаб Тоййиб Эрдўғон ташриф доирасида олий даражадаги Ўзбекистон—Туркия стратегик шериклик кенгашининг иккинчи йиғилишида иштирок этиши кутилмоқда.
Ўзбекистон ва Туркия етакчилари ўтказадиган музокараларнинг кун тартибидан икки томонлама дўстлик ва стратегик шериклик муносабатларини янада ривожлантириш ва мустаҳкамлаш, икки мамлакат ўртасидаги кўп қиррали ҳамкорликни кенгайтириш масалалари ўрин олган.
Шунингдек, халқаро ва минтақавий сиёсатнинг долзарб жиҳатлари юзасидан фикр алмашилади.
Саммит якунида қўшма баёнот ва қатор икки томонлама ҳужжатлар қабул қилиниши режалаштирилган.
Изоҳ (0)