Сўнгги бир неча ҳафта давомида Беларусдан кўпчилик одам турли давлатларга бош олиб чиқиб кетди — шу жумладан Ўзбекистонга. Шундай одамлар орасидан Вадим исмли фуқаро ўз таассуротлари билан бўлишди.
Ўзбекистонни танлаш ҳақида
Кўчиб ўтишга асосий сабаб — Украинадаги оғир вазиятлар бўлди. Беларусда яшаш, ишлашда давом этиш, айниқса, дастлабки икки кун жуда оғир кечди.
Айнан шунинг учун биз оиламиз билан вақтинчалик кўчишга қарор қилдик – юз бераётган ҳодисалардан бироз чалғиш ва ўзимизни хавфсизликда ҳис этишни истадик.
Танлов Грузия ва Ўзбекистон орасида қолди. Ушбу иккала мамлакат ҳам Европага визаси бўлмаган одамлар учун энг мақбул йўналишдек кўринди.
Грузияга чипталар тезда сотилиб кетар ва учиш учун бир ярим-икки ҳафта кутиш керак эди. Ўзбекистонга эса чипта олиш бир мунча осонроқ ва бундан ташқари, Осиё мамлакатида бўлиш қизиқарлироқ эди.
У ерда кўпчилик рус тилида сўзлашишини, одамлари меҳмондўст эканлигини, мамлакатда яшаш эса арзон эканлигини эшитдим. Мен буни ўз кўзларим билан кўришни истадим.
Тайёргарлик ҳақида
Вақтинчалик кўчиб ўтишга қарор қилган пайтдан парвоз кунигача тўрт кун ўтди, шу туфайли тайёргарлик жуда шошилинч эди.
Керакли нарсаларни учиб кетишдан бир кун олдин кечаси тайёрлаб қўйдик. Иккита катта жомадон йиғилди. Қолган нарсаларни эса уйда қолдирдик, ҳеч нимани сотиб юбормадик.
Москва орқали парвоз қилдик. Самолётдаги йўловчиларнинг деярли ярми славянларга ўхшарди — ҳойнаҳой, кўпчилик худди биз каби Украинадаги вазият сабаб учиб кетаётган эди.
Тошкентдаги нархлар ҳақида
Тошкентга тунда қўндик ва уй топгунимизча бир-икки кун меҳмонхонада қолдик.
Тошкентдаги меҳмонхоналар ва уйлар анча қиммат экан, балки бу талабнинг кескин ошиши билан боғлиқдир.
Меҳмонхонада икки кун қолишни режалаштирган эдик, аммо уй топиш масаласи чўзилгани боис яна беш кун қолишга тўғри келди — бу тахминан 300 долларга айланди.
Қиммат, лекин яхши таъмирланган уй топилди — бу биз учун муҳим эди. Бу ерда икки томонлама масала бор: суткалик уйлар одатда яхши таъмирга эга, аммо юқори нархда таклиф қилинади. Агарда уйни узоқроқ муддатга (ярим йил ва ундан узоқроқ) излаётган бўлсангиз, таъмири оддийроқ, нархи ҳам пастроқ бўлади (Минскда ҳам шундай).
Охир-оқибат Airbnb’да 900 долларга икки хонали яхши таъмирга эга уй топдик. Балки бирор-бир бошқа арзонроқ уй топишимиз ҳам мумкин эди, аммо қидиришга кўп вақт сарфлашни истамадик.
Бундан ташқари, узоқ муддатли турар-жой олишнинг ўзига яраша оворагарчиликлари талайгина экан: ҳамма ҳам четдан келган одамга уйни ижарага беришни истамайди, шундай бўлган тақдирда ҳам, ЖШШИР қилдиришга тўғри келади.
Озиқ-овқатга келадиган бўлсак, бу ердаги харажатларимизни Минскдаги билан солиштириш қийин, сабаби биз асосан етказиб бериш хизматидан фойдаланамиз, яқин атрофдаги дўконлардан кичик харидлар қиламиз. Бироқ, умуман олганда, ҳаммаси деярли бир хил — нарх бўйича ҳам, сифат бўйича ҳам.
Уйимиз яқинида дўконлар талайгина, аммо яхшироқ маҳсулотларни олишни истасак, бозорга бориб келишимиз мумкин (Минскда ҳам шундай қилардик).
Айтганча, дўконларда Беларусь товарлари ҳам бор экан, аммо улар ўзбек товарларидан қимматроқ, албатта.
Бу ерда овқатланиш ҳам Минскдаги каби бир хил нарх оралиғида, фақат палов жуда арзон.
Ижобий ва салбий томонлар ҳақида
Ўзбекистонда Skype ишламайди, аммо буни VPN орқали ҳал қилса бўлар экан.
Бу ерда йўллар ҳаддан зиёд кенг экан.
Маҳаллий такси ҳайдовчисининг айтишича, Тошкентдаги йўллар бир йўналишда уч полосадан бошланади. Биз беш полосалигини ҳам кўрдик.
Тошкентда светофор йўқ кўчаларда ҳайдовчилар пиёдаларга умуман йўл беришмас экан.
Уй интернети мобил интернетдан яхшироқ. Интернет тезлигини текшириб кўрдим, Минскдагидан паст эмас.
Мулоқотлашиш ва маълумот алмашишда ноқулайликлар деярли йўқ, бу ерда кўпчиликнинг рус тилидан хабари бор.
Одамлари жуда хушфеъл ва хушмуомала, беларусларга яхши муносабатда. Биз Беларусдан келганимизни эшитиб, у ерда вазият қандайлиги билан қизиқишади. Қайғуриш ва тушуна олиш ҳисси бор.
Visa ва Mastercard карталари деярли ҳамма жойда қабул қилинади.
Режалар ҳақида
Умуман олганда, Ўзбекистон ҳақидаги таассуротларим жуда ажойиб. Лекин бу ерни вақтинчалик яшаш жойимиз деб санаймиз.
Аниқ режа йўқлиги учун бу ерда қанча қолишимиз мумкинлигини айтиш қийин.
Аммо шунга умид қиламанки, тез кунларда Россия ва Украина ўртасидаги келишмовчиликларга барҳам берилиб, ҳаммаси тинчлик йўли билан ҳал қилинади — ич-ичимдан Ватанга ва яқинлар орасига тезроқ қайтиш истаги кучли.
Ишонаманки, ҳаммаси яхшилик билан тугайди. Ҳали яхши эмасми, демак, охири ҳали келмади.
Изоҳ (0)