Сурхондарё вилоятининг Термиз туманидаги Отчопар мавзесида вилоятнинг Наврўз тантаналари бўлиб ўтди. «Дарё» байрам тадбирдаги энг қизиқ лаҳзаларни фотокамера хотирасига муҳрлади.
Тадбирда вилоят ҳокими Тўра Боболов, Тожикистон Республикасининг Турсунзода шаҳри, Шаҳринав ва Ҳисор туманлари ҳамда Хатлон вилоятининг Шаҳритуз ва Носир Хусрав тумани раислари бошчилигидаги Тожикистон делегацияси, шунингдек, Қорақалпоғистон Республикаси Тахиатош тумани ҳокими бошчилигида бир гуруҳ фаоллар ва ёшлар ҳам иштирок этди.
Байрам тадбирида вилоятдаги мавжуд туман ва шаҳар ҳокимликлари томонидан махсус павильонлар ташкил этилиб, ўша туманга хос урф-одатлар кўрсатиб берилди.
Вилоятнинг асосий байрам тадбирида пойтахтдан келган санъаткорлар — Маҳмуд Намозов, Ҳосила Раҳимова, Лола Аҳмедова, Шаҳноза Отабоева ҳамда Дилафрўз Ҳайитметовалар куйлаб, сурхондарёликлар кайфиятини кўтарди.
Байрамда кураш мусобақаси ҳам ташкил этилиб, бош соврин 100 миллион сўм пул мукофоти учун муросасиз баҳслар бўлиб ўтди. Курашда шўрчилик Бекмурод Олтибоев 1-ўринни қўлга киритиб, 100 миллион сўм пул мукофотига эга чиққан бўлса, деновлик Шоҳрух Маҳмарасулов 2-ўринни олиб 20 миллион сўмга, узунлик Зоҳид Ҳусаинов ва деновлик Яҳё Имомовлар эса 3-ўринни қўлга киритиб, ҳар бири 10 миллион сўмлик пул мукофотига эга бўлди.
Байрам муносабати билан Термиз шаҳар ҳокимлиги ҳомийлигида ижтимоий ҳимояга муҳтож, кам таъминланган ўндан ортиқ оила фарзандларининг хатна тўйлари ҳам ўтказиб берилди.
Изоҳ (0)