Бухорода 8 гектар ерни расмийлаштириб бериш учун 16 минг доллар сўраган ўрмон хўжалиги ходими ушланди

Бухоро вилояти Қоракўл туманида 8 гектар ерни расмийлаштириб бериш эвазига пул талаб қилган шахс қўлга олинди.

Маълум қилинишича, Қоракўл Давлат ўрмон хўжалиги ходими маҳаллий МЧЖга тегишли 5 гектар ва бошқа бир фуқаро бошқарувидаги фермер хўжаликнинг 3 гектари, жами 8 гектар ер майдонини 16 минг доллар эвазига мансабдор танишлари орқали харидор номига расмийлаштириб беришни ваъда қилган. Ушбу шахс келишилган пулни олган вақтида ДХХ ва Бош прокуратура ҳузуридаги департаментнинг вилоят бошқармалари ходимлари томонидан ушланган.

Ҳозирда мазкур ҳолат юзасидан жиноят ишлари қўзғатилиб, тергов ҳаракатлари олиб борилмоқда.

Аввалроқ Навоийда тадбиркорга ер олиб бериш учун 140 минг доллар сўраган шахслар ушлангани, Оҳангарон ҳокимлиги ходими 20 минг доллар пора билан қўлга тушгани, Тошкент вилоятида президентнинг махсус фармони билан ажратилган ерни 800 минг долларга сотишга уринган шахслар аниқлангани тўғрисида хабар берилганди.