Ўзбекистон йўлларида содир бўлган йўл-транспорт ҳодисалари тафсилотларини тақдим этамиз.
Фарғона вилояти Сўх туманида икки Lacetti тўқнашди
2022 йилнинг 8 март куни соат 17:00 ларда Фарғона вилояти Сўх тумани, «Умбара» МФЙ ҳудудидан ўтган автомобиль йўлида бир йўналишда ҳаракатланиб кетаётган ҳайдовчилар, B.М. (1969 йилда туғилган) бошқарувидаги ҳамда Ф.И. (2005 йилда туғилган) бошқарувидаги Lacetti автомобиллари иштирокида тўқнашув содир бўлган.
Тўқнашув оқибатида икки ҳайдовчи ҳамда йўловчилар Ж.А. ва А.Қ. тан жароҳати билан шифохонага мурожаат қилган.
Мазкур ЙТҲ юзасидан Сўх тумани ИИБ ЙҲХГ масъул ходими томонидан суриштирув олиб борилиб, тегишли ҳужжатлар тўпланган. Ўрганиш давомида фуқароларнинг тан жароҳати бўйича тайинланган судга оид тиббий экспертизанинг хулосаси ўрганилиб, ушбу ЙТҲда Жиноят кодексининг 266-моддасида кўрсатилган жиноят таркиби мавжуд эмаслиги аниқланган.
Суриштирув давомида ҳайдовчи B.М. маст ҳолда автомобиль бошқаргани аниқланган ва унга нисбатан Маъмурий жавобгарлик тўғрисидаги кодекснинг 131- ва 133-моддалари (транспорт воситаларини маст ҳолда бошқариш ва транспорт воситалари ҳайдовчиларининг йўл ҳаракати қоидаларини бузиши жабрланувчига енгил тан жароҳати ёки анча миқдорда моддий зарар етказилишига олиб келиши) тартибида, шунингдек, ҳайдовчи Ф.И. ҳайдовчилик гувоҳномасисиз автомобиль бошқаргани аниқланган ва унга нисбатан мазкур кодекснинг 135-моддаси 2-қисми (йўл ҳаракати қоидаларида назарда тутилган ҳужжатлари бўлмаган шахсларнинг транспорт воситаларини бошқариши) тартибида тўпланган ҳужжатлар Жиноят ишлари бўйича Сўх тумани судига юборилиши чораси кўрилмоқда.
Қашқадарёда Lacetti ёниб кетди
2022 йил 17 март куни соат 20:30 ларда Қашқадарё вилояти Нишон тумани «Нуристон» МФЙ ҳудудидан ўтган автомобиль йўлида ҳайдовчи Б.Й. (1990 йилда туғилган) бошқарувидаги Lacetti ҳамда ҳайдовчи, Б.Ш. (1992 йилда туғилган) бошқарувидаги Lacetti автомобиллари иштирокида тўқнашув содир бўлган.
Тўқнашув оқибатида ҳайдовчи Б.Й. бошқарувидаги автомобилда ёнғин юзага келиб, ўт ўчирувчилар томонидан бартараф этилган.
Ушбу ЙТҲ ва ёнғин натижасида тан жароҳати олган фуқаролар йўқ. Транспорт воситаларига зарар етган.
Ҳолат юзасидан Нишон тумани ИИБ ЙҲХБ ходимлари томонидан суриштирув олиб борилмоқда.
Наманганда Matiz йўлнинг четида ёнилғиси тугаган Nexia-2 ни итариб кетаётган пиёдаларни уриб юборди
2022 йил 16 март куни соат 01:50 ларда Наманган вилояти Учқўрғон–Қўғай йўлининг 6-километрида, «Тегирмон» МФЙ Андижон кўчасида, Учқўрғон туманида яшовчи фуқаро (1996 йилда туғилган) Matiz автомашинасини ишонч қоғози билан бошқариб бораётиб, ҳаракат хавфсизлигини таъминлай олмай, йўлнинг ўнг томонида ҳаракатланиб кетаётган, Учқўрғон туманида яшовчи Б.Н. (1995 йилда туғилган) Nexia-2 русумли автомашинасини газ ёнилғиси тугаб қолгани сабабли орқасидан итариб кетаётган, Учқўрғон туманида яшовчи (1995 йилда туғилган) О.B.ни уриб юборган.
Оқибатда 1995 йилда туғилган Б.Н. оғир тан жароҳати олиб, шифохонада вафот этган ҳамда О.B. бош мия чайқалиши ташхиси билан шифохонага ётқизилган.
Ушбу ҳолат бўйича Учқўрғон туман ИИБ ҳузуридаги ТБ томонидан 2022 йил 16 март куни 266-моддаси 2-қисми (одам ўлимига сабаб бўлган транспорт бошқариш қоидаларини бузиш) билан жиноят иши қўзғатилган.
Тошкентда Spark ва Nexia тўқнашди
2022 йил 17 март куни тахминан соат 13:55 да Шайхонтоҳур тумани Қоратош кўчаси «Медиа парк» қаршисида ҳайдовчи Р.А. (1998 йилда туғилган) Nexia автомашинасини бошқариб кетаётиб, ҳайдовчи А.Й. (2002 йилда туғилган) Spark автомашинаси билан тўқнашув содир этган. Тўқнашув оқибатида тан жароҳати олганлар аниқланмади.
ЙТҲ бўйича дастлабки маълумотларга кўра, Nexia ҳайдовчиси тўғридан келаётган транспорт воситасини ўтказиб юбормай, чорраҳадан чапга бурилган. Spark ҳайдовчиси эса чорраҳага яқинлашганда тезлигини камайтириш чораларини кўрмаган.
Изоҳ (0)