O‘zbekiston yo‘llarida sodir bo‘lgan yo‘l-transport hodisalari tafsilotlarini taqdim etamiz.
Farg‘ona viloyati So‘x tumanida ikki Lacetti to‘qnashdi
2022-yilning 8-mart kuni soat 17:00 larda Farg‘ona viloyati So‘x tumani, “Umbara” MFY hududidan o‘tgan avtomobil yo‘lida bir yo‘nalishda harakatlanib ketayotgan haydovchilar, V.M. (1969-yilda tug‘ilgan) boshqaruvidagi hamda F.I. (2005-yilda tug‘ilgan) boshqaruvidagi Lacetti avtomobillari ishtirokida to‘qnashuv sodir bo‘lgan.
To‘qnashuv oqibatida ikki haydovchi hamda yo‘lovchilar J.A. va A.Q. tan jarohati bilan shifoxonaga murojaat qilgan.
Mazkur YTH yuzasidan So‘x tumani IIB YHXG mas’ul xodimi tomonidan surishtiruv olib borilib, tegishli hujjatlar to‘plangan. O‘rganish davomida fuqarolarning tan jarohati bo‘yicha tayinlangan sudga oid tibbiy ekspertizaning xulosasi o‘rganilib, ushbu YTHda Jinoyat kodeksining 266-moddasida ko‘rsatilgan jinoyat tarkibi mavjud emasligi aniqlangan.
Surishtiruv davomida haydovchi V.M. mast holda avtomobil boshqargani aniqlangan va unga nisbatan Ma’muriy javobgarlik to‘g‘risidagi kodeksning 131- va 133-moddalari (transport vositalarini mast holda boshqarish va transport vositalari haydovchilarining yo‘l harakati qoidalarini buzishi jabrlanuvchiga yengil tan jarohati yoki ancha miqdorda moddiy zarar yetkazilishiga olib kelishi) tartibida, shuningdek, haydovchi F.I. haydovchilik guvohnomasisiz avtomobil boshqargani aniqlangan va unga nisbatan mazkur kodeksning 135-moddasi 2-qismi (yo‘l harakati qoidalarida nazarda tutilgan hujjatlari bo‘lmagan shaxslarning transport vositalarini boshqarishi) tartibida to‘plangan hujjatlar Jinoyat ishlari bo‘yicha So‘x tumani sudiga yuborilishi chorasi ko‘rilmoqda.
Qashqadaryoda Lacetti yonib ketdi
2022-yil 17-mart kuni soat 20:30 larda Qashqadaryo viloyati Nishon tumani “Nuriston” MFY hududidan o‘tgan avtomobil yo‘lida haydovchi B.Y. (1990-yilda tug‘ilgan) boshqaruvidagi Lacetti hamda haydovchi, B.Sh. (1992-yilda tug‘ilgan) boshqaruvidagi Lacetti avtomobillari ishtirokida to‘qnashuv sodir bo‘lgan.
To‘qnashuv oqibatida haydovchi B.Y. boshqaruvidagi avtomobilda yong‘in yuzaga kelib, o‘t o‘chiruvchilar tomonidan bartaraf etilgan.
Ushbu YTH va yong‘in natijasida tan jarohati olgan fuqarolar yo‘q. Transport vositalariga zarar yetgan.
Holat yuzasidan Nishon tumani IIB YHXB xodimlari tomonidan surishtiruv olib borilmoqda.
Namanganda Matiz yo‘lning chetida yonilg‘isi tugagan Nexia-2 ni itarib ketayotgan piyodalarni urib yubordi
2022-yil 16-mart kuni soat 01:50 larda Namangan viloyati Uchqo‘rg‘on–Qo‘g‘ay yo‘lining 6-kilometrida, “Tegirmon” MFY Andijon ko‘chasida, Uchqo‘rg‘on tumanida yashovchi fuqaro (1996-yilda tug‘ilgan) Matiz avtomashinasini ishonch qog‘ozi bilan boshqarib borayotib, harakat xavfsizligini ta’minlay olmay, yo‘lning o‘ng tomonida harakatlanib ketayotgan, Uchqo‘rg‘on tumanida yashovchi B.N. (1995-yilda tug‘ilgan) Nexia-2 rusumli avtomashinasini gaz yonilg‘isi tugab qolgani sababli orqasidan itarib ketayotgan, Uchqo‘rg‘on tumanida yashovchi (1995-yilda tug‘ilgan) O.V.ni urib yuborgan.
Oqibatda 1995-yilda tug‘ilgan B.N. og‘ir tan jarohati olib, shifoxonada vafot etgan hamda O.V. bosh miya chayqalishi tashxisi bilan shifoxonaga yotqizilgan.
Ushbu holat bo‘yicha Uchqo‘rg‘on tuman IIB huzuridagi TB tomonidan 2022-yil 16-mart kuni 266-moddasi 2-qismi (odam o‘limiga sabab bo‘lgan transport boshqarish qoidalarini buzish) bilan jinoyat ishi qo‘zg‘atilgan.
Toshkentda Spark va Nexia to‘qnashdi
2022-yil 17-mart kuni taxminan soat 13:55 da Shayxontohur tumani Qoratosh ko‘chasi “Media park” qarshisida haydovchi R.A. (1998-yilda tug‘ilgan) Nexia avtomashinasini boshqarib ketayotib, haydovchi A.Y. (2002-yilda tug‘ilgan) Spark avtomashinasi bilan to‘qnashuv sodir etgan. To‘qnashuv oqibatida tan jarohati olganlar aniqlanmadi.
YTH bo‘yicha dastlabki ma’lumotlarga ko‘ra, Nexia haydovchisi to‘g‘ridan kelayotgan transport vositasini o‘tkazib yubormay, chorrahadan chapga burilgan. Spark haydovchisi esa chorrahaga yaqinlashganda tezligini kamaytirish choralarini ko‘rmagan.
Izoh (0)