Самарқанд ҳокимига ўринбосар, Қашқадарё ҳокимига эса янги маслаҳатчи тайинланди

Самарқанд вилояти ҳокими Эркинжон Турдимовга ўринбосар, Қашқадарё ҳокими Муроджон Азимовга янги маслаҳатчи тайинланди. Бу ҳақда «Дарё» мухбирлари хабар берди.

Самарқанд ҳокими ўринбосари — инвестициялар ва ташқи савдо бошқармаси бошлиғи лавозимида фаолият олиб борган Ойбек Эркинович бошқа ишга ўтиши муносабати билан эгаллаб турган лавозимидан озод этилиб, унинг ўрнига Ойбек  Мирзабеков тайинланган.

Ойбек Мирзабеков 1980 йил Самарқанд вилоятининг Булунғур туманида туғилган бўлиб, ушбу тайинловга қадар «Ўзсаноатекспорт» АЖ бошқаруви раиси лавозимида фаолият олиб борган.

Шунингдек, бугун Қашқадарё ҳокими Муроджон Азимовга ҳам янги маслаҳатчи тайинланган.

Қашқадарё вилояти ҳокими ўринбосари — вилоят маҳалла ва оилани қўллаб-қувватлаш бошқармаси бошлиғи лавозимида иш юритган Долли Аллаев Муроджон Азимовга жамоатчилик билан ишлаш бўйича маслаҳатчиси лавозимини эгаллаган.

Вилоят ҳокимлиги ахборот хизмати раҳбари Аҳрор Содиқовнинг қўшимча қилишича, айни кунда вилоят ҳокимининг маслаҳатчилари сони саккиз кишидан олти нафарга тушган.

«Вилоят ҳокимининг хотин-қизлар масалалари бўйича ҳамда туризм ва спортни ривожлантириш масалалари бўйича маслаҳатчиси лавозимлари қисқарди. Айни пайтда вилоят раҳбарининг фахрийлар билан ишлаш бўйича маслаҳатчиси, жамоатчилик билан ишлаш бўйича маслаҳатчиси, ахборот сиёсати масалалари бўйича маслаҳатчиси-матбуот котиби, маънавий-маърифий ишлар самарадорлигини ошириш, давлат тили тўғрисидаги қонун ҳужжатларига риоя этилишини таъминлаш масалалари бўйича маслаҳатчиси, ташқи меҳнат миграция масалалари бўйича маслаҳатчиси ва халқ таълими масалалари бўйича маслаҳатчилари фаолият юритмоқда», — дейди Аҳрор Содиқов.