Ижтимоий тармоқларда Ўзбекистон халқ артисти Юлдуз Усмонова концерт дастурида мухлисларга қўпол оҳангда гапириб, номуносиб муносабатда бўлгани акс этган видеолавҳа тарқалган эди. Истеъмолчилар ҳуқуқларини ҳимоя қилиш жамиятлари федерацияси раиси ўринбосари Иномжон Тагаевнинг сўзларига кўра, мазкур ҳолат бўйича «Ўзбекконцерт» билан ўрганиш ишлари ўтказилади.
Тарқалган видеодан кўриш мумкинки, Ўзбекистон халқ артисти Юлдуз Усмонова 12 март куни Тошкентдаги «Халқлар дўстлиги» саройида ўтказилган концертида мухлисларга қўпол муомалада бўлган.
Тагаевнинг айтишича, ушбу ҳолат бўйича «Ўзбекконцерт» давлат муассасаси билан боғланилган.
«Лицензия берувчи ташкилот — ‘Ўзбекконцерт’. Уларда бундан ташқари, санъаткорнинг лицензия талаблари ҳам бор. Яъни санъаткор одоб-ахлоқ қоидаларига риоя қилиш керак. Ҳолат тўлиқ ўрганилади. Томошабинлар билан дастлабки суҳбатда, сўзларни (қўшиқчи гапирган — таҳр.) таҳлил қилиб шуни билдикки, одоб-ахлоқ қоидалари бузилган… Истеъмолчига бунақа қўпол муомала қилиш қонун бўйича тақиқланган, бу бўйича ‘Ўзбекконцерт’ билан бевосита жараённи ўрганиб чиқиб, якуний хулосамизни айтамиз», — дейди у.
Қайд этилишича, «Халқлар дўстлиги» санъат саройида бўлиб ўтаётган концертнинг 12 март кунидаги дастурида техник носозлик туфайли саҳна пардаси тўлалигича очилмай қолган ва бунга томошабинлар эътироз билдирган. Хусусан, улардан бири қўпол оҳангда бақирган. Юлдуз Усмонова буни ҳақорат деб тушунган ва эмоцияга берилиб кетиб, концертга ташриф буюрган томошабинларга нисбатан қўпол муносабатда бўлган. Ҳолатга Маданият вазирлиги ҳам муносабат билдирган бўлиб, «санъаткордан маданият талаб қиладиган жамият омманинг ҳордиқ чиқаришига халақит қиладиган томошабинларни ҳам тартибга чақириши кераклигини»ни таъкидлаган.
Изоҳ (0)