«Ўзгидромет» кучли ёмғирлар сабабли республиканинг тоғолди ва тоғли ҳудудларида сел хавфидан огоҳлантириб, шундай хавф мавжуд туманлар рўйхатини эълон қилганди. 13 март куни қатор ҳудудларга сел келгани акс этган видеолар ижтимоий тармоқларда тарқалди.
Самарқанд вилояти Қўшробод тумани «Октябрь» қишлоғидан оқиб ўтувчи сойга сел келди. Видеотасвирда сел оқаётганига қарамай, машиналарнинг селдан ўтишга ҳаракат қилаётгани акс этган.
«Ўзгидромет» етакчи мутахассиси Эркин Абдулаҳатовнинг қайд этилишича, сўнгги 16 йиллик (2005—2021 йиллар)да Ўзбекистонда сел-сув тошқинларидан 70 киши ҳалок бўлган. Уларнинг аксарияти сел даврида машинаси орқали селни кечиб ўтиш жараёнида офат қурбони бўлган.
Самарқанд вилояти Фавқулодда вазиятлар бошқармаси сел тошқинлари бирор кимса ҳаётига хавф солган тақдирда ФВВнинг 1050 қисқа рақамига ёки 101 га мурожаат қилишга чақирган.
Жиззах вилояти Фориш тумани қишлоқларидан бирига келгани айтилаётган сел. Сел ҳудуддаги мактаб, болалар боғчаси бино иншоотларига ҳам зарар етказганини кўриш мумкин.
Қашқадарё вилояти Китоб туманидаги Қайнар ва Аёқчи қишлоғига, Чироқчи тумани Наврўз қишлоғига келгани айтилаётган сел.
Фавқулодда вазиятлар вазирлиги хабарига кўра, 13 март куни кузатилган ёғингарчиликлар оқибатида юзага келган сел оқимлари ва сув тошқинлари соҳа ходимлари ва махсус техникалари ёрдамида бартараф этилмоқда. Ҳодиса оқибатида тан жароҳати олган ва ҳалок бўлганлар йўқ.
Маълумот учун, Ўзбекистонда март ойи бошларидан буён ёмғирли об-ҳаво давом этмоқда. Ёғингарчиликдан ҳосил бўлган сув оқими Қамчиқ ва Тахтақорача довонларида автомобиль йўлининг бир қисмини ўпириб тушишига сабаб бўлди. Муттасил ёғингарчилик сабаб Бухоро шаҳридаги XVI асрга оид «Талипоч қалъа дарвозаси» чап томонидаги қалъа деворининг бир қисми ўпирилиб тушди. Бундай об-ҳаво Фарғонанинг Марғилон шаҳрида маданий мерос объекти ҳисобланмиш Сафед тўда масжиди деворининг бир қисми ўпирилиб тушишига ҳам олиб келди.
«Ўзгидромет» бундай об-ҳаво кейинги ҳафтанинг биринчи ярмигача сақланиб туришини прогноз қилган. Айрим вилоятларда кучли шамол ва момоқалдироқ бўлиши мумкин.
Изоҳ (0)