Намангандаги вилоят Маданият марказида Наманган вилояти ҳокими Шавкат Абдураззақов ва Қашқадарё вилояти ҳокими Муроджон Азимовнинг тадбиркорлар билан учрашуви бўлиб ўтди. Бу ҳақда «Дарё» мухбири Азизбек Абдувалиев хабар бермоқда.
Бундан аввал икки вилоят ҳокими Давлатобод туманидаги «Янги Ўзбекистон — ёшлар зиё маскани» кутубхонасида бўлди. Мазкур кутубхонада 30 мингта китоб жамланган, бу ерда ташкил этилган «Рақамли кутубхона» тизими орқали эса бундан бир неча карра кўп китобларни мутолаа қилиш мумкин.
Ишбилармонлар билан учрашувдан олдин вилоят Маданият марказида наманганлик тадбиркорлар томонидан ишлаб чиқарилаётган маҳсулотлар кўргазмаси ташкилланди.
Қашқадарёдан келган шаҳар, туман ҳокимлари ва тадбиркорлар 200 дан ортиқ маҳсулот ҳамда хизматлар намойиш этилган кўргазма билан танишиб, Наманган вилоятининг бизнес салоҳиятини баҳолаш имкониятига эга бўлди.
Учрашувда икки вилоятнинг ижтимоий-иқтисодий кўрсаткичлари, саноат ва ишлаб чиқариш қувватлари тақдимоти бўлиб ўтди. Шундан сўнг Шавкат Абдураззақов ва Муроджон Азимов наманганлик ва қашқадарёлик тадбиркорларнинг фикр-мулоҳаза, таклифларини тинглади, саволларига жавоб берди.
«Наманган тадбиркорлик ва кичик саноат зоналари ташкил этиш бўйича мамлакатда пешқадам вилоят ҳисобланади. Текстил соҳасида ҳам наманганликларга тенг келадигани кам. Биз бу бу борадаги тажрибани вилоятимизда йўлга қўйиш ва наманганлик тадбиркорлар билан яқиндан ҳамкорлик қилиш учун келдик», — деди Қашқадарё вилояти ҳокими Муроджон Азимов.
Изоҳ (0)