Эроннинг Ислом инқилоби посбонлари корпуси (IRGC) Ироқнинг Курдистон вилояти пойтахти Эрбилга ташланган ракеталар учун жавобгарликни ўз зиммасига олди. IRGC баёнотига кўра, зарбалар нишони «Моссад» Исроил разведкасининг икки маркази эди.
«Кеча тунда сионист фитначиларининг стратегик маркази IRGC томонидан йўлланган кучли ракета зарбаларига учради. Биз жиноятчи сионистик режимни яна бир бор огоҳлантирамизки, душманлик ҳаракатларининг такрорланиши кескин, қатъий ва бузғунчи жавобларга сабаб бўлади», — дейилади посбонлар баёнотида.
Ракеталар Исроил ҳарбий-ҳаво кучлари қирувчиларининг яқинда Дамашқ чеккасига уюштирган ҳужумига жавобан йўлланган бўлиши мумкин — ўша ҳужум оқибатида икки нафар IRGC аскари ҳалок бўлганди.
Эслатиб ўтамиз, 13 мартга ўтар кечаси Эрбил шаҳрида жойлашган АҚШнинг бош консулхонаси яқинига бир нечта ракета келиб тушгани ҳақида хабар берилди. Курдистон-24 телеканали ҳуқуқ-тартибот идораларига таяниб, жами 12 та баллистик ракета учирилганини аниқлади.
Ушбу ҳодиса Эрон ядровий келишуви бўйича муҳокамалар қайта тикланиши фонида юз берган. 7 март куни Эрон ва МАГАТЭ техник ҳамкорлик ҳақида келишиб олганди. 11 март куни Қўшма Штатлар ҳам Эрон билан ядровий келишувга ҳали имкон борлигини билдирган.
Изоҳ (0)