«Эҳтиёт бўлинг, эшиклар ёпилади, кейинги бекат... Ҳурматли йўловчилар, илтимос, ёш болали, ногирон ва ёши катта йўловчиларга жой беринг». Ушбу жумлалар билан янграйдиган эълон-огоҳлантиришни Тошкент метросига бир марта тушган йўловчи ҳам ёдлаб олиши тайин. Овоз соҳибаси ким эканига қизиқадиганлар эса кўпчилик бўлиши мумкин. «Дарё» мухбири 15 йилдан бери овози метрода жаранглайдиган сухандон, «Ўзбекистон» радиоси бошловчиси Муслима Муродова билан суҳбатлашди.
— Метрода овозингизнинг янграётганига неча йил бўлди? Эълонни ўқиш учун сухандонлар ўртасида кастинг бўлиб ўтганми? Ҳаммаси нимадан бошланган эди?
— Метродаги овозимнинг ёзиб олинганига шу йилнинг июнь ойида 15 йил бўлади. Унгача «Ўзбекистон» радиосининг дикторлар гуруҳида фаолият юритган устозларимиз: Туҳфа Аҳмедова, Раъно Деҳқонова ҳамда Манзура Аҳмадалиеваларнинг овози янграган.
Метрополитеннинг масъул ходими радиога келиб, бир қанча дикторларнинг овозини эшитиб кўрган. Ҳамкасбимиз Шуҳрат ака Ориповнинг таклифи билан мен ҳам кичик кастингда қатнашганман. Шу тариқа овозим уларга маъқул келиб, метронинг 3 та линиясидаги барча бекатлар учун эълон ўқиганман. Адашмасам, 37 та бекат эди. Кейинчалик янги линиялар очилди, уларга бошқалар эълон ўқиган. Бугунги кунда иккита линияда овозим қолган.
— Йўловчи сифатида метродан тез-тез фойдаланасизми? Қайсидир бекатга тушганда овозингизни эшитиб, нималарни ҳис қиласиз?
— Азалдан метрода юришни ёқтираман. Деярли ҳар куни тушиб тураман. Бошида овозимни эшитиб, ҳаяжонланганман. Йиллар ўтган сари бунга одатландим.
Овозимни эшитиш учун Сурхондарёда яшайдиган танишларим, синфдошларим, шогирдларим атай метрога тушиб, «Овозингизни телефонга ёзиб олдик, эшитиб юрамиз», — дея менга айтиб беришарди. Раҳматли дадам ҳам атай метрога тушиб, овозимни эшитиб, кўзларига ёш келган. Онамни ҳам ўзим билан бирга олиб тушганман.
Айрим танишларим қўнғироқ орқали гаплашганимизда «Ўзингизни кўрмаганимга анча бўлди, лекин кунора метрода сиз билан ғойибона саломлашяпман», дейишарди (кулади).
— Охирги пайтларда метро йўналишлари, бекатлари сони кўпайиб бормоқда. Лекин уларда бошқа овозни эшитяпмиз. Нима сабабдан янги линиялардаги эълонларни сиз ўқимадингиз?
— Бунга жавобни метрополитен масъулларидан сўраш керак (кулади). Танишлар, ҳамкасблар ва мухлисларнинг ҳам кўпчилиги шунинг сабабини сўрайди. Баъзилар «Илтимос, янги линияларга ҳам сиз ўқинг», деган гапларни айтади. Агар таклиф тушса, албатта, ўқиб беришим мумкин.
— Эшитишимча, карьерангизни ўқитувчиликдан бошлаган экансиз. Таълимдан радиога ўтишингизга нима сабаб бўлган?
— Тўғри, ўзбек тили ва адабиёти фани ўқитувчиси бўлганман. Мактабда ишлаб юрганимда 8 март байрами муносабати билан катта тадбир ўтказиб, унга ўзим бошловчилик қилганман. Байрам кечасини Сурхондарё вилоят телерадиокомпанияси вакиллари тасвирга олган. Ўша тадбирдан сўнг кастингга таклиф этишган. 107 нафар талабгор ичидан мен ҳам саралаб олинганман. 1999 йилда телевидение соҳасига кириб келдим. Ҳам телевидениеда, ҳам радиода ишлаб, тажриба орттирдим.
Пойтахтдаги фаолиятим 2004 йилдан бошланди. «Ўзбекистон» радиосининг дикторлар гуруҳига сухандон сифатида ишга қабул қилишган. Бугунги кунда қатор лойиҳаларда бошловчилик қиламан. Хусусан, «Тунги дилдош» мусиқий композицияси, «Яхши кайфият» тонгги эшиттириш дастури ва ахборот дастурларида микрофон қаршисида ўтираман.
— Бир пайтлар радио одамларнинг овунчоғи бўлган. Аммо сўнгги йилларда кўпчилик интернетда фаол. Омманинг радиога нисбатан бугунги муносабатини қандай баҳолайсиз?
— Бу гапларни ўзим ҳам кўп эшитаман. Тўғри, ҳозир интернет ривожланган, техника асрида яшаяпмиз. Лекин радиотингловчилар ҳамон бор. Ўзбекистон телерадиокомпаниясида тўртта радио бўлса, ҳар бири ўзининг доимий мухлисларига эга. Мазкур радиолар 22 соат фаолият юритади. Тунги эфирларимиз соат 23:00 дан 03:00 гача давом этади. Шу вақт ичида ҳам бедор бўлиб, эшитувчилар жуда кўп. «Радиосиз ҳаётимни тасаввур қилолмайман», дейдиганлар бор. Бундай илиқ ва табиий гапларни радио тинглаган одам ҳар куни эшитиши мумкин.
— Республика кўзи ожизлар жамияти томонидан яратилаётган аудиокитобларни ҳам ўқиб бераркансиз. Бу ишни кўнгилли равишда қиласизми ёки сизни ҳамкорликка таклиф этишадими?
— «Ўзбекистон» радиосига ишга келгунимга қадар кўплаб дикторлар кўзи ожиз инсонлар учун аудиокитоблар ўқиган экан. Кейин мени ҳам таклиф қилишган. Мутолаани яхши кўрганим учун ҳам бу ишни завқ билан бажараман. 17 йилдан бери жамият билан ҳамкорликда ишлаб келяпман. Ўтган вақт давомида 600 га яқин китоб ўқидим.
— Билишимча, Денов туманида туғилиб, улғайгансиз. Ота-онангиз ижодкор сифатида шаклланишингизга қандай муносабат билдирган?
— Оилада катта фарзандман. Ота-онам санъат, адабиётни яхши кўрган, ўғил-қизларининг кўнглига ҳамиша қараган. Раҳматли дадам муаллимларни жуда қадрларди, ўқитувчилик улар учун энг улуғ касб эди. Шифокор бўлишимни хоҳлашган, ўзимда ҳам тиббиёт соҳасига қизиқиш бўлган. Лекин кўнгилчанлигим сабаб бу соҳада ишлай олмаслигимни англаб етганман.
Адабиётга ҳам иштиёқим кучли бўлган. Ўқувчилик пайтларимда кўп тадбирларга бошловчилик қилганман. Яқинларим телевидение ва радиодаги чиқишларимни кўриб, ҳамиша қўллаб-қувватлаган. Онажоним ҳалигача мухлис сифатида эфирларимни эшитади, дуо қилади.
— Фарзандларингиз орасида ижод йўлини танлаганлар борми?
— Икки фарзанднинг онасиман. Ўғилларимда ижодга, санъатга мойиллик бор. Тўнғичим Ўзбекистон давлат санъат ва маданият институтини тамомлаган. Кичиги шу олий ўқув юртида таҳсил олади. Икки нафар неварам бор.
Лойиҳанинг тўлиқ вариантини «Дарё»нинг YouTube’даги саҳифаси орқали томоша қилишингиз мумкин.
Миролим Исажонов суҳбатлашди.
Тасвирчи ва монтажчи: Илҳом Хурсаналиев
Суратга олиш жараёнига амалий ёрдам бергани учун Тошкент метрополитени матбуот хизматига миннатдорчилик билдирамиз.
Изоҳ (0)