Сирдарёда халқаро террористик ташкилотга аъзолиги учун қамалган маҳкум қамоқхонадан туриб экстемистик гуруҳ тузгани аниқланди

«Тавҳид ва жиҳод катибаси» халқаро террористик ташкилотига аъзолиги учун 6 йилга озодликдан маҳрум этилган шахс қамоқхонада туриб экстемистик гуруҳ тузгани аниқланди, деб хабар беради ЎзА.

Маълум қилинишича, 2020 йилдан буён Гулистон туманидаги манзил колонияда жазо ўтаётган П.С. (1991 йилда туғилган) тўғри хулоса чиқармасдан, пинҳона равишда бошқа маҳкумларга ҳамда озодликдаги танишларига экстремистик ва ақидапарастлик руҳидаги материалларни тарқатиб келган.

У республиканинг турли вилоятларидаги жазони ижро этиш манзил колонияларида сақланаётган 20 нафар маҳкум ва 11 нафар озодликда юрган фуқаро билан алоқада бўлиб, бузғунчи ғоялар тарғиботи билан шуғулланган ва келажакда Суриядаги жангарилар сафига чиқиб кетишни режалаштирган.

ДХХ ва ИИВ Сирдарё вилояти бўйича бошқармалари ҳамкорлигида прокурор санкциясига асосан, 31 нафар фуқаронинг жазони ўташ ва яшаш манзилларида тезкор-тергов ҳаракатлари амалга оширилган.

Аниқланган ашёвий далиллар ва электрон ташувчи мосламаларда сақланган материалларда ақидапарастлик ғоялари мавжудлиги хусусида Вазирлар Маҳкамаси ҳузуридаги Дин ишлари бўйича қўмитадан олинган экспертлик хулосасига биноан, Сирдарё вилояти ИИБ Тергов бўлими томонидан Жиноят кодексининг 244-1-моддаси (жамоат хавфсизлиги ва жамоат тартибига таҳдид соладиган материалларни тайёрлаш, сақлаш, тарқатиш ёки намойиш этиш) 3-қисми «а, г» бандлари билан жиноят иши қўзғатилган.

Аввалроқ Сурхондарёда Суриядаги жангарилар лагерига қўшилишни режалаштирган 21 ёшли йигит ушлангани, Суриядаги жангарилар сафига қўшилмоқчи бўлган ўзбекистонлик эркак Россияда қўлга олингани, ДХХ халқаро террористик ташкилоти тарафдорини Ўзбекистонга олиб келгани тўғрисида хабар берилганди.