Чет эл, жумладан, Ўзбекистон фуқаролари бўлиб турган Украина–Польша чегарасидаги «Карчова» назорат-ўтказиш пункти яқинидаги тўпланиш нуқтасига 2022 йил 4 март куни Польша президенти Анжей Дуда ташриф буюрди. Бу ҳақда Ташқи ишлар вазирлигининг расмий вакили маълум қилди.
Ташрифи давомида мамлакат раҳбари биринчи навбатда Ўзбекистоннинг Польшадаги элчихонаси дипломатлари ёнига келиб, уларнинг қўлини сиқиб, шундай деди:
«Сиз юртингиз фуқаролари учун муҳим ва эзгу ишни қиляпсиз. Сизнинг ҳаракатларингизни кўриб бошқа давлатлар дипломатлари ва кўнгиллилар фаолиятингиздан илҳом олиши шубҳасиз. Менга Ўзбекистон ҳукумати ўз фуқароларини эвакуация қилишни биринчи бўлиб бошлагани ҳақида айтиб беришди ва бу саъй-ҳаракатларингизни Ўзбекистон ҳукуматининг ўз фуқароларига нисбатан муҳим эътибори ва оталарча ғамхўрлиги деб биламан.
Ҳеч қанча вақт илгари биз ҳам худди шундай вазиятга тушиб қолгандик ва сизга қўшни бўлган давлатни тарк этган фуқароларимиз ҳамда Европа мамлакатларининг фуқароларидан хавотирда эдик. Биз уларни эвакуация қилишдек бу оғир операцияни фақат Ўзбекистоннинг фаол кўмаги билан амалга ошира олдик. Бу бизнинг ёдимизда», – дейди Дуда.
Анжей Дуда ҳам Ўзбекистон фуқаролари билан самимий суҳбатлашиб, уларни қўллаб-қувватлаши ва зарур ёрдам кўрсатишини айтиб ўтди.
Бундан аввал Украинадан Польша орқали эвакуация қилинган ўзбекистонликлар сони 2,5 минг кишидан ошгани ҳақида хабар берилганди.
Мавзуга доир:
- Украинадан Молдовага ўтган ўзбекистонликлар кейинроқ эвакуация қилинади — ТИВ
- Польша орқали эвакуация қилинаётган ўзбекистонликлар 15 мартгача мамлакатни тарк этиши керак — ТИВ расмий вакили
- «Бомба портлашини кинода кўриш билан танангда ҳис қилиш бошқа экан» — шиддатли жанглар кечаётган Харьковдан қайтган ўзбекистонликлар
Изоҳ (0)