Россия қўшинлари Киев марказига қараб ҳаракатланаётгани хабар қилинди

Россия қўшинлари Украина бўйлаб Киев томонга ҳаракатланмоқда. Бу ҳақда Украина мудофаа вазири ўринбосари Анна Маляр ўзининг Facebook’даги саҳифаси орқали маълум қилди.

«Россиялик ҳарбийлар Украина Қуролли кучларига тегишли иккита автомобилни эгаллаб олиб, украиналик ҳарбийлар формасини кийган ҳолда, Оболон томондан Киев марказига ҳаракатланмоқда. Уларнинг ортидан Россия ҳарбий юк машиналаридан иборат колонна ҳаракатланиб боряпти», — деб ёзади у.

ИИВ раҳбарининг маслаҳатчиси Антон Герашконинг маълум қилишича, энг оғир кун бугун бўлади: «Душманнинг режаси — Иванкова ва Чернигов томондан танк колонналари билан Киевга кириб бориш».

«УНИАН» маълумотларига кўра, 25 февраль тонгида Россия танклари ва техникаларидан иборат колонна Иванкова посёлкасидан Киев томон (шаҳардан қарийб 80 километр узоқликда) ҳаракатланган. Аввалроқ Россия зирҳли техникаларини тўхтатиш учун посёлка яқинидаги кўприк портлатилгани айтилган эди.

Киев вилоятидаги Вишгород шаҳрида 25 февраль куни эрталаб артиллерия тўпларининг овозлари эшитилган. Шунингдек, Россия ҳарбий техникаларининг Сумкс вилоятидаги ҳаракати ҳақида маълум қилинган.

Тонгдан Киевда яна тревога сигнали ишга тушган, аҳолидан зудлик билан пана жойга яшириниш сўралмоқда. Россия Мудофаа вазирлиги Украинадаги ҳозирги вазиятга ҳеч қандай изоҳ бермаган.