Россия Чернобил АЭС ҳудуди эгаллангани ва Украинадаги 118 та ҳарбий объект ишдан чиқарилганини маълум қилди

Россия ҳарбийлари Чернобил АЭС туманидаги ҳудудни назоратга олди ва Украинадаги 118 та ҳарбий объектни ишдан чиқарди. Бу ҳақда Россия мудофаа вазирлиги баёнотига таяниб, «Интерфакс» хабар берди.

Вазирлик расмий вакили Игорь Конашенков 24 февраль куни АЭС туманидаги ҳудуд Россия ҳаво-десант қўшинлари бўлинмалари томонидан назоратга олинганини айтди. Россия ҳарбийлари Чернобил АЭСнинг украиналик қўриқчилари билан энергия блоклари ва станция саркофагини биргаликда қўриқлаш бўйича келишиб олган.

«Атом электр станцияси ҳудудида радиоактив фон нормал ҳолатда. АЭС ходимлари станция объектларига нормал режимда хизмат кўрсатишни давом эттирмоқда ва радиоактив вазиятни кузатиб бормоқда», — деди Конашенков.

Россия ҳарбийларининг Чернобил АЭСни эгаллаб олишга уринишлари ҳақида аввалроқ Украина президенти Владимир Зеленский гапириб ўтган. У мазкур ҳаракатларни «бутун Европага қарши уруш эълон қилиш» деб атаган.

Вайрон қилинган Украина ҳарбий инфратузилмаси орасида Россия Мудофаа вазирлиги вакили 13 та алоқа нуқтаси ва 11 та аэродромни қайд этган. Шунингдек, вазирлик ҳарбий техника, жумладан, 18 та танк ва бошқа зирҳли техникалар, еттита кўпмарталик ўт очиш реактив тизими, 41 дона махсус техника, бешта катер, бешта жанговар самолёт, битта вертолёт ва бешта учувчисиз учиш аппарати йўқ қилинганини айтди. Бундан ташқари, Украинанинг 14 та С-300 ва «Оса» зенит-ракета комплекслари йўқ қилинган.

Россия Мудофаа вазирлиги 150 дан ортиқ украиналик аскар таслим бўлганини маълум қилди. Змеиний ороли ҳудудида 82 нафар украиналик ҳарбий хизматчи таслим бўлган. Конашенковнинг сўзларига кўра, улар жанговар ҳаракатларда иштирок этишдан бош тортиш тўғрисида имзолар берган. «Тез орада улар оиласи бағрига қайтарилади», — деди Мудофаа вазирлиги вакили.

Украина томони аввалроқ Змеиний ороли қўлдан берилганини маълум қилган эди. Украина Ички ишлар вазирлиги раҳбари маслаҳатчиси Антон Герашченконинг айтишича, оролга йўлланган ракета ва артиллерия зарбаси натижасида 13 нафар украиналик чегарачи ҳалок бўлган. Унинг сўзларига кўра, бундан олдин уларга таслим бўлишни таклиф қилишган, бироқ улар рози бўлмаган.