Хоразмда меъморий архитектура ёдгорлиги ҳисобланувчи Дешон қалъанинг бир қисми қулаб тушгани аниқланди

Маданий мерос агентлиги Хоразм вилояти бошқармаси мутахассислари томонидан олиб борилган мониторинг натижасида хусусий хонадон ичида Дешон қалъа меъморий архитектура ёдгорлиги ҳисобланувчи деворнинг бир қисми қулаб тушгани аниқланди. Бу ҳақда агентлик матбуот хизмати хабар берди.

Маълум қилинишича, ушбу тарихий обидани сақлаб қолишга қаратилган ишларни амалга оширишга тўсқинлик қилган фуқаро А.Р.га бир неча маротаба расмий огоҳлантириш берилган. «Унинг вазиятга бўлган беписандлиги хонадонида жойлашган маданий мерос объектига зарар етказилишига ва қисман бузилишига сабаб бўлди», — дейилади хабарда.

Таъкидланишича, бу ҳолатга асосий сабаб — фуқаро томонидан уй унинг шахсий мулки эканлиги важ қилиб кўрсатилиб, агентлик мутасаддиларига қаршилик кўрсатган ҳолда уларни консервация ва реставрация қилишларига йўл қўймагани. Шунга қарамасдан агентлик мутахассислари жойига чиққан ҳолда тарихий объектни узоқдан кузатиб, фуқаро билан муросага келиш чораларини кўрган. Лекин фуқаро барча таклифларга рад жавобини берган.

Шу сабабли агентлик фуқарога нисбатан тегишли ҳуқуқни муҳофаза қилувчи органларга вазиятга ҳуқуқий баҳо бериш ва давлат муҳофазасига олинган объектда асрашга доир ишларни олиб боришга тўсқинлик қилгани учун чора кўриш тўғрисидаги тақдимнома киритиш жараёнини бошланган.

«Бу каби ҳолатлар республикамизнинг бошқа ҳудудларида ҳам афсуски кузатилмоқда. Шуларни инобатга олган ҳолда Вазирлар Маҳкамасига агентлик томонидан маҳаллий ҳокимиятларга маданий мерос объектлари атрофида жойлашган шахсий мулкларни қонунчиликда белгиланган тартибда кўчириш бўйича таклиф киритилиши тўғрисида маълум қилинади», — дея қайд этилади хабарда.

Аввалроқ ЮНЕСКО Умумжаҳон мероси объектлари рўйхатига кириши кутилаётган «Чор Бакр» мажмуидаги ер ноқонуний аукционга қўйилгани, Паркентда археологик ёдгорлик ҳудуди ғишт ишлаб чиқариш учун сотиб юборилгани тўғрисида хабар берилганди.