Сирдарё вилоятида ижтимоий тармоқлар орқали экстремистик ва террорчилик ташкилотларнинг радикал ғояларини тарғиб қилиб келган шахс қўлга олинди, деб хабар беради вилоят ИИБ ахборот хизмати.
Маълум қилинишича, Сирдарё вилояти Ички ишлар бошқармаси ва ДХХ Сирдарё вилояти бўйича бошқармаси ходимлари ҳамкорлигида тезкор тадбир ўтказилган. Тадбир давомида ижтимоий тармоқлар орқали экстремистик ва террорчилик ташкилотларнинг радикал ғояларини тарғиб қилиб келган Сирдарё туманида яшовчи 30 ёшли А.Х. қўлга олинган.
Аниқланишича, А.Х. Telegram мессенжерида виртуал гуруҳ очиб, ақидапарастликни тарғиб қилувчи аудио ва видео материалларни жойлаштириш орқали уни интернет фойдаланувчилари орасида оммалаштирган.
Шунингдек, тезкор тадбир давомида А.Х.га яқин алоқаси бўлган Ғ.Д. (1991 йилда туғилган) ҳам терговга жалб этилган.
Мазкур шахсларнинг уяли алоқа воситалари ва яшаш манзилларидан олинган далилий ашёлар процессуал тартибда расмийлаштирилиб олинган. Сирдарё вилоят ИИБ Тергов бошқармаси томонидан Жиноят кодексининг 244 прим 1-моддаси (жамоат хавфсизлиги ва жамоат тартибига таҳдид соладиган материалларни тайёрлаш, сақлаш, тарқатиш ёки намойиш этиш) 3-қисми «г» банди (оммавий ахборот воситаларидан ёхуд телекоммуникация тармоқларидан, шунингдек интернет жаҳон ахборот тармоғидан фойдаланиб содир этилган бўлса) билан жиноят иши қўзғатилган ва А.Х.га нисбатан қамоқ эҳтиёт чораси қўлланилган.
Ҳозирда тергов ҳаракатлари олиб борилмоқда.
Аввалроқ Қўқонда «Ҳизб ут-Таҳрир»га аъзолиги учун икки марта қамалиб чиққан киши яна шу жинояти учун қўлга тушгани, Фарғонада «Туркистон ислом ҳаракати» террористик ташкилоти ғояларини тарғиб қилган эркак ушлангани тўғрисида хабар берилганди.
Изоҳ (0)