Сурхондарё вилояти Жарқўрғон туманида фуқарога 15 кун муддатда ҳайдовчилик гувоҳномаси олиб беришни ваъда қилган инструктор ушланди, деб хабар беради Бош прокуратура ҳузуридаги департамент.
Маълум қилинишича, департамент ҳамда ДХХнинг Жарқўрғон туман бўлимлари томонидан тезкор тадбир ўтказилган. Тадбирда «С.И.С.» МЧЖ автомактаби ўргатувчи устаси З.Э. фуқаро А.га бошқа автомактабда ишловчи танишлари орқали Б ва C тоифадаги ҳайдовчилик гувоҳномасини ўқув машғулотларида иштирок этмасдан, 15 кун муддат ичида олиб беришни ваъда қилгани аниқланган. Инструктор бунинг эвазига 3,1 миллион сўмни олган вақтида ашёвий далиллар билан ушланган.
Мазкур ҳолат юзасидан Жиноят кодексининг 168-моддаси (фирибгарлик) ва 28, 211-моддаси (пора бериш) билан жиноят иши қўзғатилиб, тергов ҳаракатлари ўтказилмоқда.
Эслатиб ўтамиз, 3 февраль куни Тошкентда ҳайдовчилик гувоҳномасини олиш учун имтиҳон топшириш бўйича Тошкент имтиҳон маркази иш бошлаган. Ички ишлар вазири ўринбосари, жамоат хавфсизлиги департаменти бошлиғи Бекмурод Абдуллаев фақат етарли билим ва малакага эга ҳайдовчиларга гувоҳнома берилишни бошлагач, йўлларда ҳайдовчилик маданияти ошади, йўл-транспорт ҳодисалари камайишини айтиб ўтди.
Изоҳ (0)