Фарғона вилоятининг Қува туманидаги бозорда чиққан ёнғин оқибатида мавжуд дўконларнинг 25 тасига зарар етгани хабар берилганди. «Дарё» мухбири билан суҳбатлашган тадбиркорлар ёнғин сабаб катта миқдорда моддий зарар кўрганини айтмоқда.
300 миллион сўмлик товарим ёниб кул бўлди
Ёнғин чиққан бозорда савдо қилиб келганини айтган Тўланбой Назиров ёнғин ҳақида хабар берилгач, бозорга етиб келганини, воқеа жойига келганда эса дўкони ёниб кул бўлганини айтмоқда.
«Менга ёнғин ҳақида соат олтида хабар беришди. ‘Дўконинг ёняпти’, дейишди. Етиб келсам, дўконим ёниб, кул бўлган экан. 300 миллион сўмлик товарларим ёниб кетди. Бу дўконни юритиш давомида кредит олгандим. Энди Президентимиздан ёрдам кутамиз. Имтиёзли, фоизи кам бўлган кредитлар бериб, қўллаб-қувватлашсин дегандим. Тўғри, ҳозир ҳам банклар кредит беради. Лекин фоизи юқори, шунингдек, кафиллик сўрашади. Мени борим ёниб кетди. Шу боис, кафолатга ҳам ҳеч нарса қўёлмайман», — дейди тадбиркор Тўланбой Назиров.
Бозорда ўт ўчиришга мўлжалланган бурчаклар ҳам ташкил қилинмаган
Дўкони ёниб кетганини айтган тадбиркорнинг маълумот беришича, буюм бозорида фавқулодда ҳолатларда фойдаланиш учун 60 тонналик сув сақлаш ҳовузи бўлган. Аммо ҳовуз бузиб ташланиб, ўрнида дўкон қурилган. Шунингдек, бозорда ўт ўчиришга мўлжалланган бурчаклар ҳам ташкил қилинмаган.
«Бозоримизда 60 тонналик сув ҳовузи бўларди. Ўша бўлганида биз бунчалик талафот кўрмасдик. Қолаверса, ҳар бир растанинг бошида ёнғинни ўчириш бурчаги бўларди. Ҳатто ‘шланг’лар ҳам йўқ. Ёнғинни ўчириш ходимлари келганда ўзлари ҳам роса қийналди. Мен эса 101 га қўнғироқ қилиб, Тошлоқ ва Фарғонадан ҳам ёрдам юборишларини сўрадим. ‘Пожарний’ келганда бозор жойлашуви ноқулай бўлгани сабаб бозор ёнидаги ариқдан ўтолмади. Жонимни хатарга қўйиб бўлса-да, ёнғинни ўчириш ‘шланг’ларини олиб, ўзим ичкарига кириб кетдим. Майли, менинг дўконим ёнган бўлса ҳам қолганларга зарар етмасин дедим. Исломжон деган дўстимнинг дўконини, молларини сақлаб қолдик», — дейди ёнган дўкон эгаси.
Бозорда дўкони ёнган яна бир тадбиркор Козимжон Нўмонов ёнғин ҳақида соат 07:30 да хабар топганини, воқеа жойига келганда унинг дўкони ҳам буткул ёниб бўлганини айтмоқда.
Президентимиздан қўллаб-қувватлашларини, имтиёзли кредитлар беришларини сўраган бўлардик
Тўрт нафар фарзандини турмуш ўртоғи билан бирга бозордаги савдо дўконидан тушаётган даромади эвазига боқиб келаётганини айтган Нилуфар Назирова ёнғин ҳақида шеригидан хабар топганини, воқеа жойига келганда дўкони ёниб бўлганини билдирмоқда.
«Ёнғин ҳақида шеригимдан, ўша куни соат 05:45 да хабар топдим. Хўжайиним билан бирга келганимизда бозор дарвозалари ёпиқ экан. Девордан ошиб тушдик. Кўрсак, дўконимиз ёниб кул бўлган. Бизнинг бор-будимиз шу дўкон эди. Болаларимизни шу дўкондан тушаётган даромаддан боқаётгандик. Президентимиздан қўллаб-қувватлашларини, имтиёзли кредитлар беришларини сўраган бўлардик», — дейди Нилуфар опа.
Яна бир дўкон эгаси Сардор Тоировнинг айтишича, воқеа жойига ўт ўчирувчиларнинг ўз вақтида етиб келиши сабаб унга қарашли савдо дўконининг бир қисмини сақлаб қолинган.
Қува туман Фавқулодда вазиятлар бўлими бошлиғи Рафиқжон Исроиловнинг айтишича, ёнғин ҳақида бўлимга соат 06:23 да хабар келиб тушган бўлса, ёнғинни ўчириш гуруҳи воқеа жойига 06:27 да етиб борган.
Бозордаги мавжуд 326 та савдо дўконининг 302 таси сақлаб қолинган
«Воқеа жойига тумандан етиб келган иккита ёнғинни ўчириш экипажи етиб келиб, ёнғинни 06:31 да ўраб олган ва 07:10 да ёнғинни тўлиқ ўчирган», — дейди Рафиқжон Исроилов.
Маълумот берилишича, бозордаги ёнғинни ўчириш учун вилоят Фавқулодда вазиятлар бошқармасидан ҳам 11 та ёнғин қутқарув экипажи жалб қилинган бўлиб, бозордаги мавжуд 326 та савдо дўконининг 302 таси сақлаб қолинган. Ёнғин оқибатида эса 24 та дўкон зарар кўрган.
Мавзуга доир:
Изоҳ (0)