Европада 31 январь, душанба куни тунда 2022 йилги қишки трансфер ойнаси ёпилди. «Дарё» дедлайн кунининг сўнгги соатларида амалга оширилган трансферларни ушбу саҳифа орқали ёритиб борди.
«Ньюкасл» «Брайтон» ҳимоячиси билан шартнома имзолади
«Ньюкасл» «Брайтон» марказий ҳимоячиси Ден Бернни сотиб олганини эълон қилди.
«Қарғалар» 29 ёшли инглиз футболчиси билан 2024 йилнинг июнига қадар шартнома имзолади.
«Ливерпуль» футболчисини «Фулҳэм»га ижарага берди
«Фулҳэм» «Ливерпуль» ҳимоячиси Неко Уильямсни мавсум охиригача ижарага олди.
39 ёшли Жермейн Дефо «Сандерленд»га қайтди
«Сандерленд» клуби ҳужумчи Жермейн Дефо билан мавсум охиригача шартнома имзолаганини эълон қилди.
Дефо бунгача 2015—2017 йилларда ҳам «Сандерленд»да ўйнаган.
«Эвертон» Деле Аллини сотиб олди
«Эвертон» «Тоттенҳэм» ярим ҳимоячиси Деле Аллини сотиб олганини эълон қилди.
Мерсисайдликлар 25 ёшли англиялик футболчи билан 2024 йилнинг июнигача шартнома имзолади.
Аввалроқ «Эвертон» Аллини текинга қўлга киритиши хабар қилинганди. Қайд этилишича, Алли клуб сафида 20 та ўйинда майдонга тушганидан кейин 12 млн евро тўлаш ҳақидаги банд фаоллашади.
Бундан ташқари, келишувда ярим ҳимоячининг ўйин даражасига қараб катта миқдордаги бонуслар ҳам кўрсатилган.
«Барселона» тез орада Обамеянг трансферини эълон қилади
Ҳужумчи Пьер-Эмерик Обамеянг яқин соатларда «Арсенал»дан «Барселона»га текинга ўтади.
Каталония клуби 32 ёшли габонлик футболчининг трансфери ҳақида сешанба куни эрталаб эълон қилади, дея хабар беради журналист Гилем Балаге.
«Барселона» умумий дедлайнга амал қилиши шарт бўлмаган, боиси клуб Обамеянгни эркин агент сифатида ўз сафига қўшиб олган
Манбага кўра, каталонлар ҳужумчи билан бир ярим йилга шартнома тузади.
38 ёшли Горан Пандев «Парма»га йўл олди
Ҳужумчи Горан Пандев «Женоа»дан «Парма»га ўтди.
«Парма» 38 ёшли футболчининг трансферини эълон қилди, шартнома мавсум якунига қадар мўлжалланган.
«Ювентус» Аарон Рэмзидан қутилди
Ярим ҳимоячи Аарон Рэмзи «Ювентус»ни тарк этди.
31 ёшли уэлслик футболчи мавсум охиригача ижара асосида «Рейнжерс» сафига қўшилди.
Шунингдек, Глазго клуби ярим ҳимоячини сотиб олиш имкониятига эга бўлади.
Жовани Ло Челсо «Вильярреал»га ўтди
Ярим ҳимоячи Жовани Ло Челсо «Тоттенҳэм»дан «Вильярреал»га ижара асосида ўтди.
Инглиз клуби матбуот хизмати хабарига кўра, аргентиналик футболчи мавсумнинг қолган қисмини испан клубида ўтказади.
«Ньюкасл» яна бир номдор бўлмаган футболчи трансферини эълон қилди
Ҳимоячи Мэтт Таргет «Астон Вилла»дан «Ньюкасл»га ўтди.
26 ёшли футболчи «қарғалар» сафида мавсум охиригача ижара асосида ўйнайди.
«Тоттенҳэм»нинг яна бир ўйинчиси Испанияга йўл олди
«Тоттенхем» ярим ҳимоячиси Брайан Ҳил «Валенсия»га йўл олди.
20 ёшли футболчи мавсумнинг қолган қисмини испан жамоасида ўтказади.
«Барселона» дарвозабони Иняки Пеня «Галатасарой»га ўтди
Клублар футболчининг ижараси борасида келишиб олган. Туркия клуби футболчини сотиб олиш ҳуқуқига эга бўлмайди. Дарвозабоннинг ижара муддати учун маошини «Галатасарой» тўлайди.
«Манчестер Сити» Аргентина чемпионатининг энг яхши тўпурарини ўз сафига қўшиб олди
«River Плейт» ҳужумчиси Хулиан Альварес «Манчестер Сити»га ўтди.
Инглиз клуби 22 ёшли аргентиналик футболчи билан 5 ярим йиллик шартнома имзолаганини маълум қилди. Альварес камида июлгача «River Плейт»да ижара асосида ўйнашда давом этади.
Аввалроқ «шаҳарликлар» Хулиан учун бонуслар ва солиқларни ҳисобга олган ҳолда 18,5 миллион евро тўлаши хабар қилинганди.
Альварес ўтган мавсум Аргентина чемпионатида 20 ўйинда майдонга тушиб, 18 гол ва 6 голга ассистентлик қилган. У турнирнинг энг яхши тўпурарига айланганди.
«Ювентус» Денис Закарияни ўз сафига қўшиб олди
Ярим ҳимоячи Денис Закария «Боруссия М»дан «Ювентус»га ўтди.
Трансферни немис клуби эълон қилди. «Боруссия М» ва «Ювентус» барча ҳужжатларни имзолаган, футболчи Туринда тиббий кўрикдан ўтган.
Фабрицио Романога кўра, Италия клуби швейсарияликлар учун 5+3 миллион евро тўлайди.
Танги Ндомбеле «Лион»га қайтди
«Лион» «Тоттенҳэм» ярим ҳимоячиси Танги Ндомбеле 65 миллион еврога сотиб олиш ҳуқуқи билан 1,42 миллион еврога ижарага олганини эълон қилди. Клуб, шунингдек, Ромен Февр билан 2026 йилгача шартнома имзолаганини маълум қилди.
«Ювентус» ярим ҳимоячилари «Тоттенҳэм»га ўтди
«Ювентус» ярим ҳимоячи Родриго Бентанкур ва ҳужумкор ярим ҳимоячи Деян Кулушевскининг «Тоттенҳэм»га ўтганини эълон қилди.
«Тоттенҳэм» уруйвайлик футболчининг трансферини 19 миллион евро (6 миллион евро бонус ҳам назарда тутилган) сотиб олган бўлса, Кулусевски 2023 йилнинг ёзигача ижарага олинган.
«Ливерпуль» ҳимоячисини ижарага берди
Мерсисайдликлар жамоа ҳимоячиси Натаниэл Филлипсни ижара асосида мавсум охиригача «Борнмут»га жўнатди.
«Эвертон» Донни ван де Бекни ижарага олди
«Манчестер Юнайтед» ярим ҳимоячиси Донни ван де Бек ижара асосида «Эвертон»га ўтди. У Мерсисайд клуби учун муваффақиятли тиббий кўрикдан ўтган ва мавсумнинг қолган қисмини «Эвертон» сафида ўтказади.
Манбага кўра, «Эвертон» ижара шартномасига кўра футболчининг тўлиқ маошини тўлаб беради. Шунингдек, «Манчестер Юнайтед»га ижара учун ҳам алоҳида сумма тўлайди.
Мавзуга доир: Расман: Фрэнк Лэмпард — «Эвертон» бош мураббийи
Кристиан Эриксен катта футболга қайтди. У АПЛнинг «Брентфорд» клуби билан 6 ойлик шартнома имзолади. Аввалроқ келишувнинг яна бир йилга узайтирилиши мумкинлиги тўғрисида ҳам хабарлар янграганди.
«Бёрнли» Нидерландия терма жамоаси футболчисини ўз сафига қўшиб олди
«Вольфсбург» ҳужумчиси Воут Вегорст «Бёрнли»га ўтди.
Инглиз клуби нидерландиялик 29 ёшли футболчи билан 3,5 йиллик шартнома имзолаган.
Sky Sports маълумотларига кўра, Вегорст учун 12 миллион фунт стерлинг атрофида пул сарфланган.
«Галатасарай» «Фиорентина» ўйинчисини ижарага олди
«Фиорентина» ярим ҳимоячиси Эрик Пульгар Туркиянинг «Галатасарой» клубига ижарага берилди. Бу ҳақда журналист Николо Скира Twitter’да хабар берди.
28 ёшли Пульгар Чилининг «Антофагаста» клуби тарбияланувчиси ҳисобланади. Ярим ҳимоячи 2019 йилдан бери Италияда ўйнаб келаётганди.
Янада кўпроқ футбол ва спорт янгиликларидан boxабар бўлишни истасангиз, «Дарё»нинг Telegram’даги расмий спорт канали — @Daryo_Sport24’га обуна бўлинг!
Изоҳ (0)