Таэквондони ташлаб, 12 ёшида футболга кириб келгани, терма жамоадаги рақобат ва «Женоа»дан бўлган таклиф ҳақида. Иброҳимхалил Йўлдошев интервью берди

Ўзбекистон терма жамоаси ва «Нижний Новгород» клуби ҳимоячиси Иброҳимхалил Йўлдошев ЎФА матбуот хизматига интервью берди.

Футболдаги илк қадамлари ҳақида

7-8 ёшимдан футболга қизиқардим, лекин таэквондо билан шуғулланардим. У ерда ҳам дўстларим билан футбол ўйнаб турардик. 12 ёшимда таэквондони ташлаб, футболга ўтдим. Янгиер шаҳрида футбол сирларини ўрганганман, илк мураббийим Икром Давлатов бўлган. Янгиерда бўлиб ўтган мусобақада биринчи ўринни олгандик, Тошкентдан келган вакиллар ўйинимизни кузатганди. Мусобақадан сўнг улар «Пахтакор»га таклиф қилди ва Тошкентга бордим. Машғулотлардаги ҳаракатимни кўрган мураббийлар мени олиб қолди. 7-синфда «Пахтакор» академиясига қабул қилинганман.

Терма жамоадан таклиф олгани ҳақида

У вақтда «Бунёдкор»да эдим. Қўнғироқ бўлган ва терма жамоага чақирилганимни хабар қилишганди. Жуда хурсанд бўлганман. Тожикистонга қарши ўртоқлик учрашувида (2:1 ҳисобида Ўзбекистон ғалаба қозонган) дебютимни нишонлаганман.

Терма жамоанинг чап қанот ҳимоясидаги рақобат ҳақида

Албатта, соғлом рақобат бўлиши керак. Чап қанот ҳимоясида уч кишимиз, Фаррух Сайфиев, Шерзод Насруллаев ва мен. Мураббийнинг айтган вазифаларини бажариш керак, шунда қийин бўлмайди.

Сречко Катанец ҳақида 

Мураббийнинг менга ёққан жиҳати тартиб-интизомга жуда жиддий қарайди. Биринчи йиғинда ҳам интизомга риоя қилишимиз, телефонга жудаям берилиб кетмасликни талаб қилган.

«Нижний Новгород»га мослашиш ҳақида 

Жамоага киришиб кетиш қийин бўлди. Машғулотларда иштирок этдим, жамоадошларим билан чиқишиб кетиш қийин кечди. Вақт ўтгач, барчаси изига тушди.

«Нижний Новгород» мураббийи Александр Кержаков ҳақида  

Кержаков жиддий мураббий. Машғулотларга ҳам, футболчиларнинг ўзига ҳам жуда талабчан. Иккита машғулотдан сўнг асосий таркибга қўйди, бу менга бўлган ишончнинг белгиси.

«Женоа»дан бўлган таклиф ҳақида

«Женоа»дан таклиф тушганди. Аммо улар мени харид қилганидан сўнг бошқа жамоага ижарага бериб юбормоқчи эди. Ўша вақтда «Нижний Новгород»дан ҳам таклиф тушган. Улар агентим билан алоқага чиққан, кейин Александр Кержаков билан суҳбатлашдим. Европага кетишга иккиландим. Инглиз тилида сўзлаша олмайман, Европага борсам, ўйин амалиётига эга бўлманми-йўқми, билмайман, шунинг учун Россия вариантини танладим. У ерда тажриба тўплаб, кейин Европага кетишим мумкин.

Иброҳимхалил Йўлдошев, Ўзбекистон миллий терма жамоаси аъзоси

Эслатиб ўтамиз, Ўзбекистон терма жамоаси Дубайдаги йиғин доирасида 23 январь куни «Ал-Ваҳда» жамоаси билан ўртоқлик ўйини ўтказиб, 1:0 ҳисобида ғалаба қозонди. 27 январь, пайшанба куни эса Жанубий Судан 3:0 ҳисобида таслим этилди. Шунингдек, Дубайдаги йиғин доирасида 1 февраль куни Янги Зеландияга қарши ўртоқлик ўйини ўтказиш режалаштирилган.