Ўзбекистоннинг қатор вилоятларида 25 январь куни соат 11:00 ларда электр энергияси таъминоти узилгани сабаб Тошкент метрополитени фаолияти вақтинча тўхтаганди. Фавқулодда вазиятлар вазирлиги метро вагонлари ичида қолиб кетган фуқаролар олиб чиқилганини маълум қилди.
Қайд этилишича, «Тошкентметрополитени»нинг «Машинасозлар» (135 нафар), «Бодомзор-Минор» (70 нафар) ва «Амир Темур» (210 нафар) бекатлари оралиғида (вагонлар ичида) қолиб кетган жами 415 нафар йўловчи олиб чиқилган.
Шунингдек, соат 12:10 да Наманган вилояти Поп тумани 114-116-километрларида юк поезди тўхтаб қолганлиги учун 83-километрда йўловчи поезд вақтинчалик тўхтатилган. Юк поездини захира йўлга олиб қўйиш учун тепловоз ва Қамчиқ МҚЁҚБдан махсус техникаларда қутқарувчилар жалб этилган.
Бундан ташқари электр энергияси тармоқларида рўй берган узилишлар сабабли кўп квартирали уйлардаги лифтлар тўхтаб қолган. Ушбу ҳодиса юзасидан Тошкент шаҳар ФВБ тезкор бошқарув марказига 51 та лифтда қолиб кетган фуқаролар бўйича мурожаат келиб тушган, уларнинг 35 таси коммунал соҳа ташкилотлари билан ҳамкорликда, қолган 16 таси қутқарувчилар томонидан чиқариб олинди.
Мавзуга доир:
Изоҳ (0)