Ўзбекистонда иситиш, оқова ва ичимлик сув тармоқларида ҳам узилишлар кузатилиши мумкин

Ўзбекистоннинг кўплаб ҳудудларида электр энергияси тизимида кузатилган узилишлар боис, иситиш, оқова ҳамда ичимлик сув тармоқларида ҳам узилишлар кузатилиши мумкин. Бу ҳақда Уй-жой коммунал хизмат кўрсатиш вазирлиги маълум қилди.

Иқтисодчи Отабек Бакировнинг ёзишича, тез орада мобил алоқада ҳам узилишлар бошланади. Унинг сўзларига кўра, уяли алоқа компанияларнинг базавий станциялари свет ўчганда, дизель генератори билан ишлайди. Фақат дизель ёнилғиси 2 соатларга етади холос.

Шу маънода агар электр таъминоти тикланмаса, тез орада мобил алоқасида ҳам узилишлар бошланади. Шунингдек, свет бўлмаса Ўзбекистонда аксарият ҳудудларда сув ҳам бўлмайди. Бутун ‘водоканал’ тизимининг фаолияти насослар билан ишлатилади. Шу сабабли айни дамда Ўзбекистонда свет ва сув, айрим жойларда иситиш тизими ва канализация узилди, дейиш ўринлироқ», — деб ёзади у.

Аввалроқ 25 январь куни соат 11:00 ларда Тошкентнинг кўплаб туманларида электр энергияси таъминоти узилгани тўғрисида хабар берилганди. Маълумотларга кўра, электр энергияси Юнусобод, Чилонзор, Олмазор, Яшнобод, Бектемир, Миробод, Шайхонтоҳур ва бошқа қатор туманларда ўчган.

Telegram’даги TashkentLand каналининг ёзишича, электр энергияси таъминоти билан боғлиқ муаммолар нафақат Тошкент шаҳрида, балки Чирчиқ, Наманган, Самарқанд, Жиззах ва Қўқон шаҳарлари ҳам кузатилмоқда.

Энергетика вазирлигининг маълум қилишича, айни пайтда мутахассислар томонидан носозликни тиклаш ишлари олиб борилмоқда.