Фарзанд ҳар бир ота-онага чексиз қувонч бағишлайди, оилани янада мустаҳкамлайди. Эгизак фарзандлар эса бундай бахтни икки карра туҳфа этади. Қўшалоқ зурриёд кўришни ва тарбиялашни кўпчилик орзу қилиши шубҳасиз. «Дарё» эгизак фарзанди бор ўзбек шоу-бизнеси вакилларини бир саҳифага жамлади.
Ёдгора Зиёмуҳаммедова
Умрини ёш томошабинлар учун бағишлаган устоз санъаткор, Ўзбекистонда хизмат кўрсатган артист Ёдгора Зиёмуҳаммедованинг уч фарзанди бўлиб, эгизак қизлари тўнғич ҳисобланади.
«Фотима ва Зуҳра 1977 йилнинг май ойида ўн дақиқа фарқ билан дунёга келган. Улар муддатидан олдин, яъни етти ойлигида туғилган. Шу боис тўққиз ойлик бўлгунга қадар ҳаво ҳарорати бир хил хонада парваришлаганмиз. Бу борада онам ва қайнонам яқиндан кўмаклашган.
Эгизакларнинг иккисига ҳам тенг муомала қилиб, кўнглига бирдек қараш керак. Масалан, Фотима бирор воқеани айтгач, ҳеч қанча вақт ўтмай, Зуҳра ҳам худди ўша воқеани сўзлаб берса, биринчи эшитиб тургандек, жим тинглашга мажбурсиз (кулади). Қизларимни ҳозиргача хафа қилмасликка ҳаракат қиламан.
Уларни бирин-кетин турмушга узатганман. Зуҳранинг уч қизи, Фотиманинг эса икки ўғил фарзанди бор», — дейди Ёдгора Зиёмуҳаммедова.
Фотима ва Зуҳра бугунги кунда «Тантана» болалар ашула ва рақс ансамблида раҳбарлик лавозимида фаолият юритади.
Юлдуз Ҳамидова
«Темир аёл», «Тангалик болалар», «Чавандоз», «Туташ тақдирлар» каби фильм ва сериаллардаги роллари билан танилган Ўзбекистонда хизмат кўрсатган артист Юлдуз Ҳамидованинг ҳам эгизак қизлари бор.
Актриса саккиз йилдан бери Американинг Лос-Анжелес шаҳрида яшаб келмоқда. Океан ортига кетишига фарзандлари — Фотима ва Зуҳра сабаб бўлган.
«Қизларимга беш ёшлигидан инглиз тилини ўргатганман. Улар Тошкентда инглиз тилини чуқурлаштириб ўргатиладиган мактабни тамомлагач, хорижда ўқишни давом эттиришни исташди. Аввал Малайзияга, кейин АҚШга ўқишга келишди. Америкага қизларим билан келганман», — дейди актриса.
Таниқли жуфтликнинг эгизак ўғиллари
Ўзбекистонда хизмат кўрсатган артист Райҳон Ғаниева ва актёр Йигитали Мамажонов 2012 йилнинг ноябрида турмуш қурган. Жуфтлик 2014 йил май ойида эгизак фарзанд кўрган бўлиб, уларга Ислом ва Имрон деб исм қўйишган.
2016 йилнинг майида эса Райҳон ва Йигиталининг никоҳи расман бекор қилинган. Эгизак ўғиллар хонанда Райҳон қарамоғида қолган.
Аваз Охун
Оммага шахсий ҳаёти ҳақида кам гапирадиган сўз устаси Аваз Охуннинг эгизак қизлари борлигини, шубҳасиз, кўпчилик билмайди. Унинг рафиқаси 2019 йил майида Фотима ва Зуҳрани дунёга келтирган.
Тўрт фарзанднинг отаси бўлган Аваз Охун ижтимоий тармоқлардаги саҳифаларига оилавий суратларини қўймайди.
Диёрбек Бекжонов
Таниқли санъаткорлар – Меҳри ва Александр Бекжоновларнинг ўғли Диёрбек Бекжонов 2019 йили илк марта оталик бахтига эришган. Унинг Фотима ва Зуҳра исмли қизлари бор.
27 ёшли Диёрбек айни пайтда «Аристократлар» жамоаси аъзоси. У бошловчи сифатида ҳам ўз мухлисларига эга.
Абдураҳмон Мавлонов
«Дизайн» кулгу жамоаси аъзоси Абдураҳмон Мавлоновнинг эгизак фарзандлари 2017 йил 18 июнь куни туғилган. Instagram саҳифаси орқали қўшалоқ ўғилли бўлганини маълум қилган актёр нафақат Ҳасан ва Ҳусанни, балки оилавий суратларини ҳам ижтимоий тармоқларга жойламайди.
Улуғбек Холиқов
Хонанда Улуғбек Холиқовнинг эгизак фарзандлари 2021 йилнинг май ойида туғилган. Бир ўғил ва бир қиз эгизакларга қўшиқчининг яқинлари Марям ва Муҳаммадамин деб исм қўйган.
Мавзуга доир: Эгизакларни тарбиялаётган юлдузли жуфтликлар (фото)
Изоҳ (0)