Актриса Хосият Ҳусанова «Shok.uz» YouTube-каналига берган интервьюсида иккинчи турмуш ўртоғи бир ой олдин вафот этгани, азадан кўп ўтмай ишга ва тўй хизматларига чиқиб кетгани ҳақида сўзлаб берди.
«Қизимнинг дадаси эрта оламдан ўтиб кетганлар, қизим уч ёшлигида. Бошқа бир ажойиб инсонга турмушга чиқдим. Афсуски, Имронбекнинг дадаси ҳам яқинда, 2021 йил 26 декабрь куни оламдан ўтдилар», — дейди актриса.
Бошловчининг актриса бўлганингиздан афсусланасизми, деган саволига актриса шундай жавоб берди:
«Шунақа вақтда қийналаман. Хизмат пулларини олдиндан олиб қўйганмиз, пулнинг ярмини ишлатиб юборганмиз. Мажбурмиз, ишга борамиз. Бошқа касб эгалари ҳам ишга қайтади. Улар учун билинмайди-да. Улар ҳам бир ҳафта ўтиради, ишлашда давом этади, уйида аза бўлса ҳам. Лекин биз санъаткорларда шу нарса қийин. Давлат спектакллари, дублёрсиз спектакллар бор. Бир-икки спектаклдаги дублоёрим Дилбар Икромова оламдан ўтиб кетган. Ўйнашга мажбурмиз. Аза очиб, уйда ўтира олмаймиз. 3-4 кундан кейин тўйга чиқиб кетамиз ялтироқ кўйлакларни кийиб. Тирикчилигимиз шу, ишимиз шу биз санъаткорларнинг. Ҳозир одамлар бу нарсаларни анча тушуниб қолди, илгари тушунишмас эди. Ўзи азани уч кун дейишади, лекин бутун бошли инсонни уч кунда унутиб бўлмайди. Илойим, ўтганларнинг жойи жаннатда бўлсин, қолганларни саломат қилсин. 20 йил бирга яшаган бўлсак, ўзимни бахтли ҳисоблайман. Ёмон яшамадим, дунёдаги ҳамма меҳрларни йиғиб тарозини бир палласига қўйса ва у одамнинг меҳрини иккинчи паллага қўйса, иккинчи палла босиб кетарди», — дейди Хосият Ҳусанова.
Изоҳ (0)