Марсело «Реал»даги совринлар сони бўйича Серхио Рамосни ортда қолдириб, рекордчига тенглашиб олди

«Реал» Испания Суперкубоги финалида «Атлетик»ни мағлуб этди (2:0) ва мусобақа ғолибига айланди.

Мадридликлар ҳимоячиси Марсело учун бу клуб билан қўлга киритилган 23-соврин бўлди. Шу тариқа Марсело бу борадаги клуб рекордчиси Франсиско Хентога етиб олди, у ҳам 23 та совринга эга. Кейинги ўринларни Серхио Рамос (22) ва Маноло Санчис (21) эгаллаб турибди.

Марсело 2007 йилдан бери «Реал»да тўп суриб келади. У ҳозиргача беш мартадан Испания чемпионати ва Суперкубоги, тўрт мартадан Чемпионлар Лигаси ҳамда клублар ўртасидаги Жаҳон чемпионатида ғолиб чиққан. Шунингдек, ҳимоячи уч марта УЕФА Суперкубоги ва икки бор Испания Кубогини қўлга киритган.

33 ёшли бразилиялик футболчининг «Реал» билан шартномаси 2022 йилнинг ёзида якунига етади ва катта эҳтимол билан клубдан эркин агент сифатида кетади.

Марсело 2021/22 йилги мавсумда барча мусобақаларда 8 та ўйин ўтказиб, бирорта ҳам самарали ҳаракатни амалга оширмади.