Тошкент вилоятининг Нурафшон шаҳрида кўп қаватли уйнинг оралиқ қисмига тушиб кетган фуқаро чиқариб олинди, деб хабар беради ФВВ матбуот хизмати.
Маълум қилинишича, 13 январь куни Нурафшон шаҳар ФВБнинг 1050 рақамига «Обод турмуш» маҳалласида бир фуқаро бино чордоқ қисмига таъмирлаш ишларини олиб бориш мақсадида чиқиб, эҳтиётсизлик натижасида ёпиқ ҳолдаги оралиқ қисмига тушиб кетгани бўйича хабар келиб тушган.
Хабар бўйича чақирилган манзилга Нурафшон шаҳар фавқулодда вазиятлар бўлимининг қидирув-қутқарув гуруҳи жалб этилган. Кўрилган тезкор ҳаракатлар натижасида уйнинг оралиқ қисмига тушиб кетган фуқаро олиб чиқилиб, воқеа жойида биринчи тиббий ёрдам берилган ва жабрланувчига малакавий ёрдам кўрсатилиши учун шифокорларга топширилган.
Ҳозирда унинг аҳволи яхши экани айтилмоқда.
Аввалроқ Олмазорда қудуққа тушиб, аҳволи ёмонлашган икки фуқарога ёрдам кўрсатилгани, ФВВ ходимлари Жиззахда қудуққа тушиб кетган сигирни қутқаргани, Андижонда хандақ қазиётганда тупроқ босиб қолган фуқаро қутқарилгани ҳамда Тошкент ва Самарқанд вилоятида қудуққа тушиб кетган фуқаролар қутқариб олингани ҳақида хабар берилганди.
Изоҳ (0)