Коронавирус секин-аста маълум бир ҳудудга хос эндемик инфекцияга айланиб бормоқда. Бу ҳақда ЖССТ бош эпидемиологи Мария Ван Керкхове маълум қилди.
«Ушбу вирус эндемикка айланиш йўлида турибди. Бу шубҳасиз», — дейди эксперт. Унинг таъкидлашича, ҳозирда пандемия «энг қизғин паллада»: касалланиш ҳолатлари ортмоқда, шу билан бирга мамлакатларнинг соғлиқни сақлаш тизимларига юкламалар ҳам ортяпти. «Ҳозирча биз ушбу босқичга етмадик», — дея қайд этади Керкхове.
Инфекционистнинг қўшимча қилишича, вирус пандемиянинг ривожланишини олдиндан айтиш қийин бўлгани сабаб ўзгармоқда. Бунинг устига мамлакатлар пандемияга қарши турлича курашяпти. «Бу ерда грипп ёки бошқа мавсумий инфекциялар каби олдиндан бирор нима дейиш қийин. Балки бунга ҳам етиб борармиз, аммо ҳозир эмас», — дея тушунтиради ЖССТ вакили.
2021 йилнинг декабрида ЖССТ раҳбари Тедрос Гебрейесус 2022 йилда коронавирус пандемияси якунланиши мумкинлигини тахмин қилганди. Коронавирус эндемикка айланиши ҳақида ташкилот эксперти Дэвид Хейманн 2020 йилнинг декабрига айтган.
2022 йилнинг 8 январида кипрлик олимлар гуруҳи коронавируснинг янги 25 та варианти аниқланганини маълум қилди. Унинг генетик асоси дельта штамм билан бир хил, аммо омикронга хос мутация ҳам бор. Шу сабабли вируснинг янги тури дельтакрон номини олган.
Керкховенинг сўзларига кўра, гибриднинг пайдо бўлиши ҳақидаги маълумотлар секвенирлаш учун олинган вирус намунасининг ифлосланиши натижасида юзага келиши мумкин.
Аввалроқ бутун дунёда коронавирусга чалинганлар сони 300 миллиондан ошгани, Ҳиндистонда омикрон штаммидан биринчи ўлим қайд этилгани, Италияда 50 ёшдан ошганлар учун COVID-19 га қарши мажбурий эмлаш жорий қилингани, Жанубий Кореяда омикрон билан боғлиқ дастлабки ўлим ҳолатлари кузатилгани ҳақида хабарлар берилган.
Изоҳ (0)