Тошкент шаҳрида 7 январь куни ЙҲХ ходимларининг қонуний талабларига бўйсунмай, қочишга уринган Malibu автомобилни тўхтатишда ўқотар қуроллардан фойдаланилганди. Қоидабузар ҳайдовчи ҳолат сабабини маълум қилди.
Эслатиб ўтамиз, 7 январь куни соат 15:00 ларда Юнусобод тумани Янги шаҳар кўчаси бўйлаб кучли даражада маст бўлган фуқаро А.А. (1976 йилда туғилган) Malibu автотранспортида шу ерда хизмат ўтаётган ЙҲХ ходимларининг қонуний талабларига бўйсунмасдан, ўзгаларнинг ҳаёти ва соғлиғига хавф солган ҳолда қочишга уринган. Ходимлар ҳайдовчининг ноқонуний ҳаракатлари натижасида юзага келиши мумкин бўлган оғир оқибатларнинг олдини олиш мақсадида белгиланган тартибда ўқотар қурол қўллаган. Натижада автотранспорт воситаси мажбурий тўхтатилиб, ҳайдовчи зарарсизлантирилганди.
«Юнусобод тумани Янгишаҳар кўчасида йўлнинг қарама-қарши томонидан Malibu русумли давлат рақами бўлмаган автоулов катта тезлик билан ҳаракатланиб келаётган пайтида йўлнинг ўртасига чиқиб, тўхтатиш мақсадида диққат ишорасини бердим. Диққат ишорага бўйсунмасдан ҳаракатлангани, фуқаролар ҳаётига хавф солгани ва ходимларнинг қонуний талабларига бўйсунмагани сабабли ИИВ меъёрий буйруқ ва талабларига асосан қурол қўлладим», — деган ЙПХ инспектори Элшод Раҳматов.
Ҳужжатлар ўрганилганида ушбу фуқаро 2006 йилда жиноят ишлари бўйича Чирчиқ шаҳар суди томонидан Жиноят кодексининг 266-моддаси (транспорт воситалари ҳаракати ёки улардан фойдаланиш хавфсизлиги қоидаларини бузиш) 1-қисмида кўрсатилган жиноятни содир этгани, жиноят иши ярашув билан тугатилгани аниқланган.
2007 йилда эса шу турдаги жиноят иши амнистияга асосан якунланган.
Бундан ташқари, ҳайдовчи 2021 йилда хавфсизликни камарини тақмаслик, қизил чироқдан бўйсунмасдан ўтиш, рухсатсиз туси ўзгартирилган ойна ўрнатиш, транспорт воситаларини қувиб ўтиш ва йўл белгиларига амал қилмаслик каби қоидабузарликларни содир этган. Бунинг учун жами 7 миллион 900 минг сўмдан зиёд жаримага тортилган.
«Белдирсойга бордим. Ўша ерда ароқ ичдим. Тўрт кун турдим, бешинчи куни бу ер қимматлик қиларкан, деб ҳисоб-китоб қилмоқчи бўлдим. Ёнимдаги пул етмасди, Тошкентга дўконимдан пул олиш мақсадида келгандим. Тўғри уйимга келдим. Ходимларнинг тўхтатишига қарамасдан, қонуний талабларига бўйсунмадим. Қилган ишларимдан афсусдаман, айб менда, бўйнимга оламан. Ароқ ичибман, пиво ичибман, кейин ‘вообше’ ўчиб қолибман», — деган Malibu ҳайдовчиси.
Ҳолат юзасидан Жиноят кодексининг 219-моддаси (ҳокимият вакилига ёки фуқаровий бурчини бажараётган шахсга қаршилик кўрсатиш) билан жиноят иши қўзғатилган. Ҳозирда дастлабки тергов ҳаракатлари олиб борилмоқда.
Изоҳ (0)