«Тухум экспорти чеклангани — вақтинчалик чора». Иқтисодиёт вазирлиги тухум экспорт қилишга чеклов қўйилганини тасдиқлади

Ўзбекистонда тухум экспорти учун вақтинчалик чеклов жорий этилгани ҳақидаги хабарлар рост. Буни Иқтисодий тараққиёт ва камбағалликни қисқартириш вазирлиги тасдиқлади.

Қайд этилишича, пандемия шароитида ишлаб чиқариш, иқлим ва логистика билан боғлиқ сабаблар таъсирида жаҳонда асосий озиқ-овқат маҳсулотлари нархларида сезиларли ўсиш кузатилмоқда. Бунга жавобан дунёнинг кўплаб мамлакатлари томонидан ички бозорда озиқ-овқат хавфсизлиги ва нархлар барқарорлигини таъминлаш мақсадида айрим маҳсулотлар экспортини чеклаш бўйича чоралар кўрилмоқда.

2021 йилнинг сентябрь—декабрь ойларида республика бўйича тухум нархи 19,6 фоизга, айрим ҳудудларда эса 20-22 фоизгача қимматлашган. Тухум нархининг ошишига қиш ойларида иситиш харажатлари ошиши ва паррандачилик хўжаликларида касалликларнинг авж олиши, тухум беришга мослашган товуқларнинг мавсумий янгиланиши, озуқа маҳсулотларининг қимматлашиши ҳамда куз мавсумидан бошлаб ушбу маҳсулотга талабнинг ортиб бориши (бошқа ойларга нисбатан 20-30 фоизга ошади) таъсир кўрсатган. Йилнинг қиш мавсумида ушбу маҳсулот нархига қўшимча босим юзага кела бошлайди.

Бундан ташқари, паррандачилик хўжаликларида озуқа базасининг етишмаслиги билан боғлиқ муаммолар сабабли кўплаб хўжаликлардаги паррандалар сони умумий ҳисобда 1 миллиондан ортиқ миқдорга камайган.

Глобал пандемиянинг давом этаётганини, асосий озиқ-овқат маҳсулотлари нархларининг аҳоли харид қобилиятига таъсирининг юқорилиги, шунингдек, ички бозорда нархлар барқарорлигини таъминлашнинг муҳимлигини инобатга олган ҳолда, тухум экспортига нисбатан киритилган чеклов вақтинчалик чора ҳисобланади.

Эслатиб ўтамиз, блогер Баҳодир Аҳмедов 5 январь куни Telegram’даги каналида «Тухумга тақиқ: бош вазир йиғилиш баённомаси, асл таклиф берганлар маълум» сарлавҳали пост жойлаштирган. Унда бир қатор вазирликлар божхонадан 1 апрелгача тухум ўтказмаслик таклифи билан чиққани, бунинг бошида Ветеринария қўмитаси тургани айтилаётгани келтирилган.

Ветеринария ва чорвачиликни ривожлантириш давлат қўмитаси тухум экспортига тақиқ қўйилгани ҳақидаги хабарга раддия берди. Унда айтилишича, «тухум экспорти бўйича тадбиркорларга оғзаки ёки ёзма тақиқ қўйилмаган. Шунингдек, тадбиркорлар тухум импорт қилувчи мамлакатларнинг меъёр ва тартибларига мувофиқ экспорт қилишлари учун қўмита томонидан чеклов ўрнатилмаган».