Ўзбекистонда 2026 йил якунига қадар камбағалликни камида 2 бараварга қисқартириш режалаштирилмоқда

Ўзбекистонда янги иш ўринлари яратиш, аҳоли даромадларини ошириш ва шу орқали 2026 йил якунига қадар камбағалликни камида 2 бараварга қисқартириш режалаштирилмоқда. Бу ҳақда 2022—2026 йилларга мўлжалланган тараққиёт стратегиясини 2022 йилда амалга ошириш бўйича «Йўл харитаси» лойиҳасида белгиланган.

Унга кўра, камбағалликни қисқартириш давлат дастурларини ишлаб чиқиб, амалга оширилиш мақсад қилинган.

Норасмий ишлаётган 2,5 миллион нафар фуқаронинг бандлигини легаллаштиришга ёрдам бериш орқали уларда ижтимоий кафолат ва имтиёзлардан тўлиқ фойдаланиш имконияти яратилади.

Аёллар орасидаги ишсизлик даражасини 2 марта камайтириш, 700 мингдан зиёд ишсиз хотин-қизларни давлат ҳисобидан касб-ҳунарга ўқитиш кўзда тутилган. Иш билан банд бўлмаган хотин-қизларни тадбиркорлик ва ўзини ўзи банд қилиш бўйича комплекс чора-тадбирлар амалга оширилади.

Шунингдек, имконияти чекланган ва ногиронлиги бўлган шахсларнинг бандлигини 3 баравар ошириш режалаштирилмоқда.

Бундан ташқари, давлат ижтимоий ёрдами ва хизматларини кўрсатишда маҳаллий даражада («маҳаллабай» тамойили асосида) ижтимоий ишларни олиб бориш механизмини йўлга қўйилади.

Ҳудудлар, шаҳарлар ва туманлар кесимида камбағал тоифадаги оилалар, аёллар ва ёшларни ягона электрон ҳисобга олиш тизимини яратиш, камбағалликнинг қайта тикланиш хавфини бартараф этиш чоралари кўрилади. Ҳунармандчилик фаолиятини ривожлантириш кўзда тутилган.

Ижтимоий нафақа тайинлаш мезонларига жавоб берадиган барча эҳтиёжманд аҳолининг камида 85 фоизи ижтимоий ёрдам дастурлари билан қамраб олинади. Ижтимоий ҳимояга муҳтож оилалар ва аҳоли қатламларига, шунингдек, вақтинчалик оғир шароитга тушиб қолган фуқароларга тўғридан-тўғри давлат ижтимоий ёрдамини кўрсатиш белгиланган.

Халқаро стандартларга асосан аҳолига ижтимоий ёрдам ва ижтимоий хизматларни кўрсатиш тамойиллари ва меъёрларини ўзида мужассам этувчи Ижтимоий кодексни қабул қилиш режалаштирилмоқда.

Пенсияни ҳисоб-китоб қилиш учун ўртача иш ҳақининг максимал миқдорини пенсияни ҳисоблаш базавий миқдорининг 10 бараваридан 12 бараваригача ошириш кўзда тутилган.

Эслатиб ўтамиз, Президент Шавкат Мирзиёев 2020 йил бошида мамлакатда камбағаллик даражаси 12—15 фоиз атрофида эканини айтганди. «Гап 4-5 миллион аҳоли вакиллари ҳақида кетяпти. Бу — жуда катта рақам», — деган эди давлат раҳбари Олий Мажлисга мурожаатида.