Ўзбекистон йўлларида содир бўлган бахтсиз ҳодисалар тафсилотларини тақдим этамиз.
Қашқадарёда йўл таъмирлаётган ишчини Nexia уриб кетди.
2021 йил 27 декабрь куни соат 19:00 да Нишон тумани «Ширинобод» МФЙда яшовчи П.Т. ўзининг бошқарувида бўлган Nexia автомашинасида Нишон–Таллимаржон автомобиль йўлининг 25-километрида таъмирлаш ишлари олиб бораётган Нишон тумани Йўллардан фойдаланиш унитар корхонаси йўл бўлими ишчиси С.I.ни уриб юборган.
Оқибатда жабрланувчи олган тан жароҳати оқибатида воқеа жойида вафот етган. Ҳозирда мазкур ҳолат юзасидан Нишон тумани ИИБ ТБ томонидан терговга қадар суриштирув ҳаракатлари олиб борилмоқда
Бухорода Hyundai ёниб кетди.
Дастлабки маълумотларга кўра, 2022 йил 3 январь куни соат 14:20 ларда Бухоро вилояти, Вобкент тумани ҳудудидан ўтувчи М-37 автомобиль йўлининг 241-километрида ҳайдовчи, А.Р. (1986 йилда туғилган) бошқарувидаги Hyundai Портер юк автомобилининг салон қисмида ҳаракат вақтида ёнғин юзага келган.
Ҳайдовчи транспорт воситасини зудлик билан тўхтатган. Ёнғин ўт ўчирувчилар томонидан бартараф этилган.
Ҳодиса оқибатида тан жароҳати олган фуқаролар йўқ. Транспорт воситасига зарар етган.
Мазкур ҳодиса юзасидан Вобкент тумани ФВБ ва ЙҲХБ ходимлари томонидан суриштирув ҳаракатлари олиб борилмоқда.
Қаршида ЙТҲга учраган Sparkда ёнғин чиқди
Қашқадарё вилоятининг Қарши шаҳрида ЙТҲга учраган Spark автомобилида ёнғин чиқди. Бу ҳақда «Дарё»га вилоят Фавқулодда вазиятлар бошқармаси ахборот хизмати раҳбари Соҳиб Ваитов маълум қилди.
Қайд этилишича, автомобилда ёнғин 2022 йилнинг 3 январь куни соат тахминан соат 21:18 да содир бўлган.
«Қарши шаҳар Фавқулодда вазиятлар бўлимига Қарши шаҳар Ислом Каримов кўчаси ‘Ватанпарварлар’ боғи рўпарасида автомобилда ёнғин содир бўлаётгани тўғрисидаги хабар келиб тушган. Хабарга кўра, воқеа жойига битта қутқарув бўлинмаси соат 21:20 да етиб бориб, соат тахминан 21:22 да ёнғин тўлиқ ўчирилган», — дейди Соҳиб Ваитов.
Қўшимча қилинишича, ёнғин оқибатида автомобилнинг олд ва матор қисми зарар кўрган.
«Аниқланишича, ёнғин йўл транспорт ҳодисаси оқибатида рўй берган. Мазкур транспорт воситаси Қарши шаҳри ‘Шохбекат’ маҳалласида яшовчи 1975 йилда туғилган фуқаро Н.Ў га тегишли бўлиб, ёнғин натижасидан ҳеч ким тан жароҳати олмаган», — дейди вилоят Фавқулодда вазиятлар бошқармаси ахборот хизмати раҳбари.
Изоҳ (0)