2022 йилнинг биринчи иш кунида Туркманистон президенти Гурбангули Бердимуҳамедов Мари вилоятига ташриф буюрди. Бу ҳақда ТДҲ давлат агентлиги хабар берди.

Фото: ТДҲ давлат агентлиги

Маълум қилинишича, Бердимуҳамедов вертолётда «Galkynyş» газ конига ташриф буюрган. Бу ерда уни «Туркменгаз» давлат концерни Табиий газ илмий тадқиқот институти директори, «Туркменгеология» давлат корпорацияси раиси, «Туркменгаз» давлат концерни раиси ҳамда мамлакатдаги ёнилғи-энергетика комплексига масъул Вазирлар Маҳкамаси раиси ўринбосари Ш. Абдураҳмонов кутиб олган.

Бердимуҳамедовга мазкур ҳудудда аниқланган истиқболли конлар, уларни ўзлаштириш усуллари ҳақида батафсил маълумот акс эттирилган чизма ва схемалар тақдим этилган. Репортажда таъкидланишича, углеводородга бой ресурслардан самарали фойдаланиш, шунингдек, мазкур соҳадаги кенг кўламли лойиҳаларни атроф-муҳитга зарар етказмасдан амалга оширишга оид масалани ҳал этишда энг илғор технологиялардан фойдаланилган.

Шу билан бирга, Bloomberg агентлигининг маълум қилишича, Туркманистонда атмосферага чиқарилаётган металл бутун дунё учун жиддий хавфни юзага келтирмоқда ва иссиқхона газини чиқариш бўйича Туркманистон фақатгина АҚШ ва Россиядан кейин туради.

Шундан сўнг, Гурбангули Бердимуҳамедов Мари вилоятидаги яйловлар ҳолати билан танишган ва Довлран Язлиев чўпон лагерига ташриф буюрган. Чўпон «ғурур билан халқ етакчиси бу ерларга мўл-кўллик олиб келганини — охирги кучли ёмғир дала ўсимликларининг ўсишига фойдали таъсир кўрсатишини, бу айниқса, майда кавш қайтарувчи ҳайвонларнинг хавфсиз қишлаши учун муҳим эканлигини таъкидлаган».

Аввалроқ Ашхободда Гурбангули Бердимуҳамедовнинг шеърига бағишланган махсус конференция ўтказилгани, Гурбангули Бердимуҳамедов Туркманистонда нефть-газ комплекси назоратини ўғлига топширгани тўғрисида хабар берилганди.